"Liverpul" hujumchisi Muhammad Saloh Karim Benzemaga qarshi kechadigan "Oltin to‘p" uchun kurashdi o‘zining imkoniyatlarini baholadi.
“Oxirgi safar 40 ta gol urgan bo‘lsam-da, "Oltin to‘p"da g‘alaba qozona olmadim, biroq o‘shanda birorta ham sovrin yuta olmadik. Bu safar biz bitta kubokni qo‘lga kiritdik, oldinda ikkita final va chempionat bor. Ko‘ramiz, kim g‘alaba qozonadi", - dedi hujumchi Sky Sports nashriga bergan intervyusida.
2018 yilda Saloh 52 o‘yinda 44 ta gol urib, dunyoning eng yaxshi futbolchisi sovriniga da’vogarlar qatorida edi, biroq "Liverpul" bilan Chempionlar ligasi finalida mag‘lub bo‘ldi, shuningdek, Rossiyadagi jahon chempionatida ham muvaffaqiyatsiz ishtirok etdi.
Saloh joriy mavsumda 45 ta o‘yinda 30 ta gol urdi. "Liverpul" allaqachon Liga kubogini qo‘lga kiritgan va hali ham uchta sovrin uchun kurashmoqda.
