"Nyukasl" "Lester" darvozaboni Kasper Shmeyxelga qiziqish bildirmoqda. Darvozabonning shartnomasi 2023 yilda tugaydi va klub mavsum oxirida shartnomani uzaytirish bo‘yicha muzokaralar stoliga o‘tirish niyatida ekani avvalroq xabar qilingandi.
Biroq, darvozabon "Nyukasl"ga o‘tishi mumkin, deb xabar beradi talkSPORT. Eddi Xau shogirdlari yozgi transfer oynasida katta kuchayishga intilishmoqda va Shmeyxel ularning maqsadlaridan biri.
Boshqa tomondan, "Lester" Premyer-ligada unchalik muvaffaqiyatli mavsum o‘tkazmadi. Klub yevrokuboklarga chiqa olmadi.
Shmeyxel joriy mavsumda APLda 35 ta o‘yinda maydonga tushib, har bir o‘yinda 1,57 ta gol o‘tkazib yuborgan va 7 ta o‘yinda o‘z darvozasi daxlsizligini saqlab qolgan.
