2016 yilda 25 yoshda bo‘lgan Oskar birdaniga «Chelsi»dan «Shanxay»ga o‘tib ketgandi. Katta pul evaziga. Bemalol aytish mumkinki, Oskar o‘shanda karyerasini pulga almashgan - Yevropada ko‘zga ko‘ringan futbolchi Xitoyga ketsa, futboldan ketdi degani - balki futbol o‘ynab yurgandir, bilmaymiz, ko‘rmaymiz. Terma jamoaga chaqirilmaydi, gollari ijtimoiy tarmoqlarda aylanmaydi, «Oltin to‘p» nomzodlari ikki yuztaligida ismini uchratmaymiz. Oskar darajasidagi iqtidor uchun bu futboldan ketish emasmi?

Bir qaraganda, Kilian Mbappening «Real»ni rad etib, «PSJ»da qolish qarori shu holatga o‘xshaydigandek tuyuladi. Fransiya juda bir Xitoy yoki AQSH bo‘lmasayam, futbol jamoatchiligi e’tiboridan chetroqda. Rostanamda, qarang, Fransiya chempionatida «Mets» yoki «Renn»ga ko‘plab gol urib yurish mumkin, dunyo qayrilib ham qaramaydi. Buni «Barselona»dan Parijga borgan Neymar ham o‘z tanasida his qilgan, bir muddat o‘zini baxtsiz qilib yurgandi ham. Nahotki, bolalikdagi «Qirollik klubi» orzusi, «el-klassiko»larning yangi qahramoni bo‘lish imkoniyatini qanchadir yuz millionga almashsa-ya? Axir «Real» va «Barsa» bu dunyoni ikkiga bo‘lib yuboruvchi klub, qanaqa tuzsiz odamsiz-e, Kilian! :)

Ammo bir qaraganda shunday, xolos. Manimcha, Mbappe agar Parijda yana o‘ynash uchun aqlbovar qilmas pul olish taklifiga ko‘nmoqchi bo‘lsa ayni vaqti hozir. Ideal palla.

Sababi, bu mavsum unikal. Shu ma’nodakim, kelayotgan mavsum o‘z ichiga jahon chempionatini oladi. Mundial mavsum boshida yoki oxirida emas, aynan mavsum ichida bo‘lib o‘tadi. Bu nima degani?

Birinchi va yagona marta Fransiya chempionati vakili mavsum davomida rakursimizdan yo‘qolib qolmaydi.

«PSJ»ning o‘z yulduzlarini mahrum qilib qo‘yadigan yagona status shu edi - qancha gol uring, qancha assist amalga oshiring, qanchalik zo‘r o‘ynang, shu ishni Mbappe qildi ham shu yili, baribir dunyo e’tiboridan chetdasiz. Sizni Benzema, Saloh yoki hatto Sandro Tonali darajasida ham eslashmaydi. Mbappe haqida xabarlar faqat Chempionlar Ligasida gol urganda va «Real»ga o‘tishi haqidagi mish-mishlar bo‘lganida o‘qildi xolosdek go‘yo. To‘g‘rimi?

Bu safar unaqa bo‘lmaydi. Kuzda Mbappe «PSJ»da o‘ynamay tursayam bo‘ladi - jahon chempionati bor. Qatardagi turnirning o‘zi futbolchi uchun yarim mavsumga yetadi. Baribir barcha chempionatlardagi birinchi davra, u yerda boksing dey bo‘ladimi, boshqami, farqi yo‘q, mundial soyasida qolib ketadi. Mundial qahramonlari asosiy planga chiqishadi.

Bahorda esa, Chempionlar Ligasi. Katta ehtimol bilan u yerda «PSJ» ham bo‘ladi. Benzemadan so‘rang, YECHL o‘yinlari o‘z darajasi bilan har qanday chempionatning chempionlik intrigalariga soya solishga qodir. Shubhasiz.

Ya’ni, Mbappe bu safar endi «PSJ»da o‘ynasayam, xuddi Benzema, Saloh, De Bryuyne va boshqa, go‘yoki kattaroq ligalardagi hamkasblari bir bir qatorda ko‘z o‘ngimizda bo‘ladi. Qayerdadir chetda, Fransiya chempionatida yurgandek tasavvur bo‘lmaydi.

Boshqa oddiy yillarda «Real» yoki «Barselona» Mbappega Parij bera olmayotgan nimadirni taklif qila olardi, albatta. Ammo bu safar emas.

Jahon chempionati mezbonligini yutvolib, uni qishga ko‘chirishga erishgan qatarliklar qaysidir ma’noda, bilmagan holda, Mbappeni kelajakda bir kun olib qolishga zamin hozirlagan bo‘lib chiqishdi.

Qahramon Aslanov.