Bugun O‘zbekiston futbol assosiasiyasida O‘FA rahbariyati, terma jamoalar bo‘limi mutaxassislari, murabbiylar hamda sport shifokorlari ishtirokida yig‘ilish bo‘lib o‘tdi.
Dastlab 23 may kuni davlatimiz rahbari raisligida o‘tkazilgan yig‘ilishda ko‘tarilgan dolzarb masalalar, xususan, sportni yanada ommaviylashtirish, sport ta’limini yaxshilash va iqtidorli sportchilarni tayyorlash bo‘yicha ishlarni tizimli tashkil etish, bu borada uzviy “zanjir”ni yo‘lga qo‘yish borasida oldinda turgan vazifalar yuzasidan so‘z bordi.
O‘FA rahbariyati O‘zbekiston U-15 va U-16 terma jamoalarining murabbiylar shtabi bilan tashkil etilayotgan yig‘inlarning tahlili, futbolchilarning holati va imkoniyatlari, shuningdek, yaqinlashib kelayotgan musobaqalarga tayyorgarlik rejalari xususida suhbatlashdi.
O‘zbekiston U-15 TJ bosh murabbiyi Zayniddin Tojiyev Xorvatiyada o‘tkazilgan yig‘in haqida hisobot berdi. Uning qo‘l ostidagi jamoanining ishtiroki tahlil qilindi. O‘z o‘rinda, Tojiyev bir qator masalalar yuzasidan o‘z takliflarini bildirdi.
Shuningdek, kuni kecha CAFA musobaqasida ishtirok etgan O‘zbekiston U-16 TJ bosh murabbiyi Jamoliddin Rahmatullayev Tojikistonda o‘tkazilgan turnir haqida to‘xtalib o‘tdi. U-17 Osiyo kubogining saralash bosqichiga tayyorgarlik rejasi, oldinda turgan vazifalar haqida so‘z bordi.
Murabbiylar bilan suhbatda har kunlik mashg‘ulotlarga zamonaviy yondashish, tahlil, raqiblarni o‘rganish, shuningdek, yangi texnologiyalarni jalb etish bo‘yicha topshiriqlar berildi. Shu bilan bir qatorda, bu yosh toifasidagi bolalarning rivojlanib borishini doimiy nazorat qilib borish muhim ekanligi, sport psixologiyasi, farmakologiya, vitaminizasiya va tiklanish jarayoniga jiddiy e’tibor qaratish zarurligi ta’kidlandi.
Yig‘ilish yakunida mas’ullarga yillik taqvim rejalaridan kelib chiqib, xalqaro o‘rtoqlik turnirlariga jamoalarimizni ko‘proq jalb qilish hamda kuchli terma jamoalar bilan o‘rtoqlik o‘yinlarini tashkil etish, murabbiylarning talablaridan kelib chiqib, tashkiliy masalalarni hal qilish yuzasidan topshiriq berildi.
