Mbappe haqidagi ko‘p munozaralarda uning futbolni emas, pulni tanlagani haqidagi fikrlar uchrayapti. Men bu farazga unchalik qo‘shilmayman. Axir Mbappe o‘shancha pulni nima qiladi?

Tasavvur qiling, sizga 200 million dollar pul taklif qilishdi. Yana boshqa taklif – 300 million dollar, ammo evaziga hayotingizdagi qandaydir komfortdan voz kechasiz. Deylik,  hech qachon kola ichmaysiz yoki osh yemaysiz. Shunaqa shart. Bilmadim, albatta, 200 millionni olib, hech narsani cheklamasdan mazza qilib yashash yaxshiroqdek tuyuladi. O‘rtadagi yuz million farq u qadar bilinmaydi, chunki yashash tarzingizda kamrog‘i ham bor ehtiyojlaringizga yetadi. Osh va kolaning qadri 100 million bo‘lmasa-da...

Ammo bir taklifda umuman pul yo‘q, ikkinchisida esa, 50 million dollar bo‘lsa, tabiiyki, oshdan ham, koladan ham osongina voz kechasiz to‘g‘rimi?

Kimdir Holandni Ronalduga, Mbappeni Messiga qiyoslaganda haq edi. Birlari o‘sishi, katta futbolchiga aylanishi uchun doimiy kurash, maqsad va to‘siqlar, ularni oshib o‘tishi kerak, ikkinchilar esa, Xudo bergan iste’dod – buyukligini mahallada o‘ynasa ham isbotlayveradi. Xullas, Mbappe pulni emas, o‘z komfortini, unga berilayotgan katta e’tiborni va imkoniyatlarni tanladi. “PSJ” “Real”dan ko‘ra kattaroq pul taklif qilgandir, to‘g‘ri, lekin shu bilan birga parijliklar ko‘proq imkoniyatlar va sharoitni ham taklif qilgani ham fakt.

Hatto hamma masalani pul hal qilgan taqdirda ham, o‘sha pulga muhabbat emas, kim ko‘proq pul berayotgan bo‘lsa, o‘sha tomon uni ko‘proq qadrlayotgani haqidagi fikr boshqaradi insonni.

U – futbolchi. Biznesmen emaski, “juda ko‘p pul” bilan “undanam ko‘p pul”ning farqini anglay olsin...

Qahramon Aslanov.