Portugaliya terma jamoasi darvozaboni Sa - «Vulverhempton» a’zosi, tugagan mavsumda APLda eng ko‘p seyv qilgan darvozabon. Eng yaxshi, xullas.

Ruben Diash - markaziy himoyachi, so‘nggi ikki yilda APLning eng yaxshi himoyachisi va chempioni.

Qanotlarda Konselu - APL g‘olibi, Trent bilan birga eng zo‘r ikki qanot himoyachilari. Semedu - sobiq «Barselona»chi. Gereyru - Dortmundda o‘ynaydi, Yevropaning eng to‘purar himoyachilaridan biri.

Bernardu Silva - Yevropaning eng kuchli jamoasi «Manchester Siti»ning eng kuchli ikki yarimhimoyachisidan biri. Oxirgi mavsumda eng zo‘ri ham. Brunu Fernandesh - eng kuchli liga bo‘lmish APLda eng ko‘p vaziyat yaratadigan hujumkor yarimhimoyachi, oxirgi uch yilda Angliyada eng yaxshi besh futbolchidan biri. Yana Nevesh, Moutinyo, Sanshesh...

Hujumda Diogu Jota - «Liverpul» safida uchinchi, APLda beshinchi to‘purar, Joao Felish - «Atletiko»ning eng qimmatbaho xaridi, Ispaniya chempioni, Leau - Italiya chempioni «Milan»ning eng yaxshi futbolchisi.

Krishtianu Ronaldu...

Shu futbolchilar bilan Portugaliya bemalol «Evropa Braziliyasi» nomiga loyiq bo‘lishi mumkin edi, deyarli butun tarkib eng kuchli liganing eng yetakchi futbolchilaridan iborat. Ammo zerikarli, himoyaviy, o‘ta pragmatik, nursiz futbol, natijayam qoniqarlimas.

Olti yil oldin yuqorida sanalgan futbolchilarning birortasi yo‘q edi. Balkim o‘sha eski tarkib uchun Santushning falsafasi, uslubi mos kelgandir. Ammo hozir... Agar mundialdayam Santush qoladigan bo‘lsa, esiz Portugaliya.

Qahramon Aslanov.