Португалия терма жамоаси дарвозабони Са - «Вулверҳэмптон» аъзоси, тугаган мавсумда АПЛда энг кўп сейв қилган дарвозабон. Энг яхши, хуллас.

Рубен Диаш - марказий ҳимоячи, сўнгги икки йилда АПЛнинг энг яхши ҳимоячиси ва чемпиони.

Қанотларда Конселу - АПЛ ғолиби, Трент билан бирга энг зўр икки қанот ҳимоячилари. Семеду - собиқ «Барселона»чи. Герейру - Дортмундда ўйнайди, Европанинг энг тўпурар ҳимоячиларидан бири.

Бернарду Силва - Европанинг энг кучли жамоаси «Манчестер Сити»нинг энг кучли икки яримҳимоячисидан бири. Охирги мавсумда энг зўри ҳам. Бруну Фернандеш - энг кучли лига бўлмиш АПЛда энг кўп вазият яратадиган ҳужумкор яримҳимоячи, охирги уч йилда Англияда энг яхши беш футболчидан бири. Яна Невеш, Моутиньо, Саншеш...

Ҳужумда Диогу Жота - «Ливерпуль» сафида учинчи, АПЛда бешинчи тўпурар, Жоао Фелиш - «Атлетико»нинг энг қимматбаҳо хариди, Испания чемпиони, Леау - Италия чемпиони «Милан»нинг энг яхши футболчиси.

Криштиану Роналду...

Шу футболчилар билан Португалия бемалол «Европа Бразилияси» номига лойиқ бўлиши мумкин эди, деярли бутун таркиб энг кучли лиганинг энг етакчи футболчиларидан иборат. Аммо зерикарли, ҳимоявий, ўта прагматик, нурсиз футбол, натижаям қониқарлимас.

Олти йил олдин юқорида саналган футболчиларнинг бирортаси йўқ эди. Балким ўша эски таркиб учун Сантушнинг фалсафаси, услуби мос келгандир. Аммо ҳозир... Агар мундиалдаям Сантуш қоладиган бўлса, эсиз Португалия.

Қаҳрамон Асланов.