«Барселона» муҳим музокаралар ўтказиш учун ўз делегациясини Лондонга юборди. Хусусан, Англияга спорт директори Деку ҳамда унинг ёрдамчилари — Боян Кркич ва Жоау Амарал йўл олган.

Журналист Жерар Ромеронинг тасдиқлашича, «кўк-анорранглилар» вакиллари аллақачон Лондонга етиб боришган. У ерда делегация «Челси» раҳбарияти билан ҳужумчи Жоао Педронинг эҳтимолий трансфери бўйича учрашув белгилаган. Музокараларда бразилиялик футболчининг агентлари ҳам фаол иштирок этмоқда.

Қайд этилишича, «Барселона» ҳужум марказини кучайтириш учун иккита асосий вариант устида иш олиб бормоқда. Биринчи номзод — «Челси»дан Жоао Педро, иккинчиси эса «Атлетико Мадрид» аъзоси Хулиан Альварес. Идеал сценарийда каталонияликлар ҳар икки тўпурар билан шартнома имзолашга умид қилишмоқда.