Европа миллатлар лигаси «А» дивизиони 3-гуруҳида 3-тур учрашуви бўлиб ўтди. Унда Испания терма жамоаси Чехияни 3:1 ҳисобида мағлуб этди.

Учрашувнинг 6-дақиқасида Испания терма жамоаси вингери Ламин Ямал ҳисобни очди. 35-дақиқада ярим ҳимоячи Родри испанларнинг устунлигини икки тўпга етказди.

Чехия 69-дақиқада Иржи Сламанинг голи эвазига фарқни қисқартирди. Бироқ 85-дақиқада Чехия капитани Ладислав Крейчи иккинчи сариқ карточкасини олиб, майдондан четлатилди.

Испанияликлар сон жиҳатидан устунликдан унумли фойдаланиб, 89-дақиқада Микель Меринонинг голи билан якуний ҳисобни ўрнатди — 3:1.

Шу тариқа, Испания 3 та учрашувдан сўнг 9 очко жамғариб, 3-гуруҳ пешқадами бўлиб турибди. Чехия эса очко жамғара олмаган ҳолда 4-ўринда бормоқда.

Миллатлар лигаси, «А» дивизиони, 3-гуруҳ, 3-тур
3 октябрь, Овьедо, «Нуэво Карлос Тартьере»
Испания — Чехия 3:1
Голлар: Ямал, 6; Родри, 35; Мерино, 89 — Слама, 69.
Четлатиш: Крейчи, 85.