«Манчестер Юнайтед»нинг собиқ ярим ҳимоячиси ва сардори Рой Кин португалиялик футболчи Бруну Фернандешнинг «ёлғончилик» ҳақидаги айбловларига ижтимоий тармоқ орқали кескин жавоб берди.
Низо қандай бошланди?
Ҳаммаси Рой Киннинг «Ноттингем Форест»га қарши ўйиндан (3:2) сўнг Брунуни танқид қилишидан бошланди. Киннинг таъкидлашича, «Юнайтед» сардори жамоа манфаатидан кўра кўпроқ мавсумдаги ассистлар рекордини янгилаш (21 та голли узатма билан рекорд ўрнатди) ҳақида қайғурган.
«Қойил. Қандай қилиб футболчи майдонга шахсий кўрсаткичлари ҳақида ўйлаб тушиши мумкин? Бундай фикрлаш билан соврин ютиб бўлмайди», — деган эди Кин.
Брунунинг муносабати
Фернандеш «Diary of a CEO» подкастида бу айбловларни рад этиб, Кинни ёлғон гапиришда айблади:
«Мен танқидга қарши эмасман, лекин одамлар ёлғон гапиришини ёқтирмайман. Ройнинг сўзлари — ёлғон»
Ҳатто вазиятга ойдинлик киритиш учун Уле-Гуннар Сульшердан Киннинг телефон рақамини сўраганини ҳам қўшимча қилди.
Киннинг «эшак» ҳақидаги жавоби
Брунунинг интервьюси эълон қилингач, Рой Кин ўзининг Инстаграм саҳифасига эшак тасвирланган расм ва қуйидаги иқтибосни жойлаштирди:
«Ҳаддан ташқари эътибор эшакни ўзини шер деб ҳисоблашига сабаб бўлади».
Гарчи Кин Брунунинг исмини тилга олмаган бўлса-да, инглиз матбуоти ва мухлислар буни тўғридан-тўғри португалиялик футболчига қаратилган «зарба» деб баҳолашмоқда.
