«Manchester Yunayted»ning sobiq yarim himoyachisi va sardori Roy Kin portugaliyalik futbolchi Brunu Fernandeshning «yolg‘onchilik» haqidagi ayblovlariga ijtimoiy tarmoq orqali keskin javob berdi.
Nizo qanday boshlandi?
Hammasi Roy Kinning «Nottingem Forest»ga qarshi o‘yindan (3:2) so‘ng Brununi tanqid qilishidan boshlandi. Kinning ta’kidlashicha, «Yunayted» sardori jamoa manfaatidan ko‘ra ko‘proq mavsumdagi assistlar rekordini yangilash (21 ta golli uzatma bilan rekord o‘rnatdi) haqida qayg‘urgan.
«Qoyil. Qanday qilib futbolchi maydonga shaxsiy ko‘rsatkichlari haqida o‘ylab tushishi mumkin? Bunday fikrlash bilan sovrin yutib bo‘lmaydi», — degan edi Kin.
Brununing munosabati
Fernandesh «Diary of a CEO» podkastida bu ayblovlarni rad etib, Kinni yolg‘on gapirishda aybladi:
«Men tanqidga qarshi emasman, lekin odamlar yolg‘on gapirishini yoqtirmayman. Royning so‘zlari — yolg‘on»
Hatto vaziyatga oydinlik kiritish uchun Ule-Gunnar Sulsherdan Kinning telefon raqamini so‘raganini ham qo‘shimcha qildi.
Kinning «eshak» haqidagi javobi
Brununing intervyusi e’lon qilingach, Roy Kin o‘zining Instagram sahifasiga eshak tasvirlangan rasm va quyidagi iqtibosni joylashtirdi:
«Haddan tashqari e’tibor eshakni o‘zini sher deb hisoblashiga sabab bo‘ladi».
Garchi Kin Brununing ismini tilga olmagan bo‘lsa-da, ingliz matbuoti va muxlislar buni to‘g‘ridan-to‘g‘ri portugaliyalik futbolchiga qaratilgan «zarba» deb baholashmoqda.
