Garchi, klublar yozgi tanaffusga chiqib ketgan bo‘lsa-da, iyunida ko‘plab qiziqarli uchrashuvlar bizni kutib turibdi. Ba’zi bir jamoalar JCH saralash doirasidagi o‘yinlarni o‘tkazayotgan bo‘lsa, ba’zi Yevropa qit’asi vakillari Millatlar ligasida maydonga tushmoqda. Shuningdek, bir qancha terma jamoalar esa bo‘lajak jahon chempionatiga tayyorgarlik doirasida muhim bo‘lgan o‘rtoqlik uchrashuvlarini o‘tkazishadi. Ikki kun oldin Argentina Estoniyani yirik hisobda mag‘lub etdi (5:0). To‘g‘ri, yevropaliklar o‘z qit’asida kuchsiz jamoa hisoblanadi va ushbu o‘yinda Messi jamoadoshlarining g‘alabasi tabiiy holatdir. Ammo, o‘sha bahsdan keyin Argentina Qatarda o‘tadigan JCHning asosiy favoritlaridan biri ekanligini amalda isbotlashdi. Shuningdek, ularni Finalissimada Italiyani mag‘lub etganini ham unutmaslik kerak. Bugun esa biz sizlarga nima uchun Mundialda Argentina asosiy favoritlardan ekanligini tushuntirishga harakat qilamiz.
Ha, to‘g‘ri aytdingiz. Messining Estoniyaga qarshi o‘yindagi penta-triki hech narsani anglatmaydi. Ushbu o‘yin tufayli argentinaliklar aniq JCHga aylanadi deyishdan ham yiroqmiz.
Noyabr oyida Qatarda Jahon chempionati boshlanadi va jamoalar Mundial oldidan tayyorgarlik ko‘rishiga ko‘p vaqt yo‘q. Bo‘lajak jahon chempionati qaysidir ma’noda o‘zgacha bo‘ladi. Odatda, katta turnir boshlanishidan oldin barcha jamoalar bir oyga yaqin tayyorgarlik ko‘rishlari kerak. Bu yil jahon chempionati arafasida tig‘iz taqvim tufayli uzoq tayyorgarlik davri bo‘lmaydi. Terma jamoalarda hozirda faqat iyun oyi bor, ular yana sentyabrda yig‘ilish imkoniyatiga ega bo‘lishadi va tamom. Keyin juda qisqa pauza va Jahon chempionatining boshlanishi. Shu boisdan ham iyun oyidagi xalqaro tanaffus juda muhim.
Biz bugun jahon chempionatida g‘oliblikka asosiy da’vogarlarning barchasini ko‘rib chiqishga harakat qilamiz. Braziliya har doim jiddiy raqib bo‘lib kelgan. Buning uchun "pentakampeonlar"ning so‘nggi Amerika kubogidagi va 2022 yilgi Jahon chempionati saralashdagi o‘yinlarini eslashingiz mumkin. Braziliyaliklar ko‘p jihatdan o‘z yetakchilarining o‘yin mahoratiga tayanadilar. Ba’zida bu o‘zini oqlaydi, ba’zida esa yo‘q. Shu sabab, ularning o‘yini jahon chempionatida g‘alaba qozonish uchun yetarli emasdek tuyulmoqda.
Yevropa jamoalari esa ko‘plab muammolar ichida yuribdi. Jahon reytingida ikkinchi o‘rinni egallagan Belgiya pastga sho‘ng‘ishda davom etmoqda. Yevro-2020dagi muvaffaqiyatsizliklardan keyin Martines shogirdlarida o‘yinni tashkil qilish borasida ham, taktika borasida ham kamchiliklar ko‘zga tashlana boshladi. Qolaversa, yoshi katta futbolchilardan tashkil topgan himoya chizig‘i ham qoniqarli emas.
Fransiya esa tarkib borasida muammoga duchor bo‘lgan. Yo‘q, yo‘q! Futbolchi yetishmovchiligi emas, “uch ranglilar” futbolchi ko‘pligi borasida muammoga duch kelgan. Desham tarkibdagi hammadan maksimal foydalanishga harakat qilib ko‘rmoqda, ammo natijada kutilmagan hisoblar qayd etilmoqda. Biz amaldagi jahon chempionlarini Yevro-2020da Shveysariyaga qanday qilib mag‘lub bo‘lganini ko‘rdik, shuningdek, Millatlar ligasi 1-turi doirasida daniyaliklar ham Mbappe boshchiligidagi jamoani “tiz cho‘ktira” oldi.
Inglizlarda yetakchilar yetishmasligi kuzatilmoqda - Grilish, Reshford, Sterling, Sancho, Maunt turli sabablarga ko‘ra yaxshi formada emas. Natijada, “uch sherlar” kamtarin vengerlarni ham mag‘lub eta olmadi.
Ispanlarning ham tarkibi yaxshi. Ammo ularda hujumkor futbolchilar ko‘p. Ba’zida “qizil furiya”ning himoyasi pand beradi. Shu sababdan Enrike shogirdlari ko‘pincha kulgili gollarni o‘tkazib yuboradi.
Nemislar ham oldingidek kuchli emas, ularda ham qandaydir kamchiliklar bor.
Yevropaliklar ichida gollandlar va daniyaliklarning o‘yinini alohida e’tirof etish mumkin, lekin ularni jahon chempionati g‘olibi sifatida tasavvur qilish qiyin. Balki, yashil qit’a vakillari orasida faqat portugallarni ajoyib formada deyishimiz mumkindir?! Biroq, ularda ham muammo bor: ular ba’zida o‘zlariga ishonmay o‘ynaydilar. Shuningdek, Ronaldu jamoadoshlari yulduzlar kabi harakat qilmaydi.
Bu fonlarda Argentina haqiqatan ham yaqqol ajralib turadi. Lionel Skaloni jamoasida haqiqatdan ham o‘sish kuzatildi. Agar biz o‘tgan yili Amerika kubogini qo‘lga kiritgan va hozirgi jamoani solishtiradigan bo‘lsak, bu ikkovida katta tafovut borligini bilish mumkin. Argentinaliklar ancha dadilroq va kuchliroq o‘ynashmoqda. Janubiy amerikaliklar bosimga asoslangan futbol tashkil qilib, raqiblarini kuchsizlantirishga harakat qilmoqda. Boz ustiga, Skaloni “PSJ”da omadsiz mavsum o‘tkazgan Messini ham qayta kashf qila oldi. Di Mariya ham uyg‘onish davrini boshdan kechirmoqda: maydonga tushadi, gol uradi va assist qayd etadi.
Messi haqida alohida gapirish kerak. U hech qachon terma jamoada so‘nggi ikki yildagidek yorqin, fidokorona o‘ynamagan bo‘lsa kerak. Messi haqiqatdan ham yetakchi.
Albatta, jahon chempionatiga hali olti oy bor. Vaholanki, hozir argentinaliklar kuchli ko‘rinmoqda. Terma jamoada sovrinlar yutishni boshlagan Messining ishtahasi ochilgandek. Endi u JCH sovriniga ham intilmoqda.
Eng qizig‘i, JCH-2022 turnir jadvali shunday tuzilganki, agar Argentina va Portugaliya o‘z guruhlarida g‘alaba qozonsa, finalda to‘qnash kelishlari mumkin. Messi va Ronaldu o‘rtasidagi jahon toji uchun hal qiluvchi o‘yindan ham ajoyibroq narsani tasavvur qilish qiyin, bizningcha.
Jamshidbek Mahmudov tayyorladi.
