Ertaga 15 iyun kuni yurtimizda o‘tayotgan 23 yoshgacha bo‘lgan futbolchilar o‘rtasida yarim final uchrashuvlari bo‘lib o‘tadi. O‘zbekiston terma jamoasi final yo‘llanmasi uchun Yaponiyaga qarshi maydonga chiqadi. "Kunchiqar yurt" jamoasi bosh murabbiyi Go Oiva o‘yin oldidan o‘z fikrlarini bildirib o‘tdi.

"Yarim finalda ishtirok etish — biz uchun quvonchli jihat. Ammo biz hali hech narsaga erishmadik. Final yo‘llanmasini qo‘lga kiritish uchun O‘zbekiston to‘sig‘idan o‘tishimiz kerak. O‘zbekistonga qarshi o‘yin og‘ir kechishini taxmin qilyapmiz.

Hujumkor o‘yin ko‘rsatish — bu bizning uslubimiz va o‘yin falsafamiz. Men jamoani qabul qilib olganimdan buyon shunday o‘ynab kelyapmiz. Men uchun ham, jamoa uchun ham shunday o‘yin muhim va qulay. Hujumning yakuniy pallasida bizga ishonch yetishmayapti, deb ayta olmayman. Umuman olganda, sovrin qo‘lga kiritish hamisha bizning maqsadimiz bo‘lgan va bu safar ham uyga quruq qo‘l bilan qaytib ketishni istamaymiz", — dedi Oiva.