Tailandga qarshi uchrashuvdan keyin milliy terma bosh murabbiyi Srechko Katanes katta musobaqa oldidan tayyorgarlik uchun 1 oy vaqt berilsa, natija ko‘rsata olishini aytdi.

Osiyo kubogi reja bo‘yicha 2023 yilning 16 iyun kuni start oladi. Futbolchilar maqomi va transferi bo‘yicha reglamentga ko‘ra, A toifadagi termaning qit’a chempionatiga tayyorgarligi uchun klublar futbolchilarni 14 kun avval terma ixtiyoriga yuborishi shart. Shundan kelib chiqib, biz 2023 yilgi mavsum uchun taqvim shakllantirayotganda Coca-cola Superliga uchrashuvlarini 31 mayga qadar davom ettirish ustida ishlayapmiz. Katanes aytganidek, unga 1 oy berish uchun, biz chempionatni 15 maydayoq to‘xtatishimiz kerak bo‘ladi. Ayni futbol mavsumida ketma-ket ikki yil bu kabi katta pauzalarning yuzaga kelishi xavotirli. Shundan kelib chiqib, O‘zPFL may-iyun oylariga Liga kubogini rejalashtirgan.   

Legioner futbolchilarimiz Katanes ixtiyoriga oldinroq ham yetib kelishlari mumkin. Boisi, ular to‘p surayotgan ligalarda mavsum katta ehtimol bilan 25 mayga qadar yakuniga yetadi. Bu albatta murabbiy uchun yaxshi yangilik bo‘ladi. Biz terma jamoa bilan kelishuv vaqtida albatta buni ham inobatga olamiz.

Diyor Imomxo‘jayev.