Avval xabar berganimizdek, «Real Madrid» prezidenti "El Chiringuito"ga intervyu berdi. Peres barchaga taniqli bo‘lgan jurnalist Pedrerol bilan suhbatda bo‘ldi va intervyu darhol Kilian haqidagi savollar bilan boshlandi.

"Mbappe hozirda «PSJ» futbolchisi. Bir necha yil ichida nima bo‘lishi mumkinligini ko‘ramiz. Biz har doim tarkibimizni yaxshilashni xohlaymiz. Kelajakda nima bo‘lishini bilmayman. Ammo hozir u «PSJ» futbolchisi. Mbappening ahvoli bir sababga ko‘ra o‘zgardi. Unga misli ko‘rilmagan siyosiy bosim o‘tkazildi.‌‌

Mbappe sotqinmi? U hech kimga xiyonat qilmadi. Lekin bu biz kutgandek bo‘lmadi. Mbappe o‘z orzusini almashtirdi. Men Mbappeni hozir ham yaxshi ko‘raman, lekin, ha, yaqin yillarda men uni «Real Madrid»ga olib kelmoqchi bo‘lgan o‘yinchi sifatida ko‘rmayapman. Hech bir futbolchi «Real»dan ustun bo‘la olmaydi.‌‌ Madridistlarning hafsalasi pir bo‘ldi va men buni tushunaman. Lekin bu endi men "Real"ga olib kelmoqchi bo‘lgan Mbappe emas. Menimcha, u bosim tufayli fikrini o‘zgartirdi. Agar shunday bo‘lsa, «PSJ»da qolsin. «Real» Mbappening orzusi ekanligiga ishonardim. Menimcha, uning onasi ham ko‘chib kelmoqchi bo‘lgan (Ispaniyaga), chunki u o‘g‘lining orzusini bilardi. 3 yildan keyin nima bo‘ladi? Biz uzoqni ko‘ra olmaymiz. Shuni aytmoqchimanki, bu endi men klubga olib kelmoqchi bo‘lgan Mbappe emas. Ha, biz Makron Mbappega doimiy ravishda qo‘ng‘iroq qilganini bilamiz. U futbolchiga bosim o‘tkazdi. Mbappe o‘z qarori haqida menga shaxsiy xabar orqali ma’lum qildi, ammo men bunga ahamiyat bermadim. Hech kim bizning klubdan ustun bo‘la olmaydi.‌‌

Holand? Bizda dunyoning eng yaxshi hujumchisi - Benzema bor. Biz Holandni zaxira o‘rindig‘iga o‘tkazish uchun shartnoma imzolay olmasdik. Bu boshidanoq aniq edi.‌‌ Mbappe ikki davlat tomonidan bosim ostida edi. Ammo takror aytaman - biz ko‘rib turgan Mbappe Madridga kerak emas.‌‌ Men Mbappening yangi shartnoma tafsilotlarini bilmayman. Unga ko‘proq siyosiy bosim ta’sir qildi. U vahimaga tushdi. Kilian pulni tanladimi? U nafaqat qulay yo‘lni, balki «PSJ»da yangi rolni ham tanladi. Mbappe uchun eshiklarimiz yopiqmi? «Real Madrid» nimaligini va klubdan yuqori bo‘la olmasligini tushunadigan futbolchilar uchun Madridning eshigi doim ochiq.‌‌

Tebasning «PSJ» haqidagi arizasi? Menimcha, Tebas bizga yordam bermayapti. Bizda juda ko‘p bahsli vaziyatlar bor. «Real», «Barselona» va «Atletik» birgalikda CVC shartnomasi bo‘yicha La Ligani sudga beramiz. Laportaga CVC bilan shartnoma imzolash uchun katta bosim o‘tkazildi.

«Barselona» dunyodagi eng yirik klublardan biri, ular qiyin vaziyatni boshdan kechirishmoqda, lekin buni yengib o‘tishadi. «Real Madrid» va «Barselona» — dunyodagi eng buyuk ikki klub, buni «el-klasiko» paytida ko‘rasiz.‌‌ Umid qilamanki, Levandovski «Barselona»ga o‘tadi. Bu La Liga uchun ajoyib bo‘ladi. La Liga rahbariyati o‘zini «Barselona»ning sport direktoridek his qiladi va ular qachon klub kim bilandir shartnoma imzolashi mumkin, qachon qaysidir futbolchini qo‘lga kirita olmasligini aytishadi. «Barselona» xohlaganini qilsin. Ularga bosim o‘tkazmang. Men Tebas, Cheferin yoki Rubiales bilan qahva ichishim mumkin. Men hech kimdan ranjimayman, faqat Madridning manfaatlarini himoya qilaman. Men Tebasga CVC shartnomasi noqonuniy ekanligini aytdim. Kelgusi 50 yil davomida ular bizning televideniya huquqlarimizni tortib ololmaydilar.‌‌ «PSJ», «Chelsi» yoki «Manchester Siti»ni dushman deb hisoblamaymiz.‌‌ Cheferin bizni Chempionlar Ligasidan chetlatishidan hech qachon qo‘rqmaganmiz. U Madrid bilan hazillashmasligi kerak. UEFA — monopoliya. Biz nima sababdan UEFA Chempionlar Ligasi finalini o‘tkazish uchun Parijni tanlaganini bilmoqchimiz. Bizga UEFA'dan tushuntirish kerak", — dedi Peres.