Saudiya Arabistoni U23 terma jamoasi bosh murabbiyi Saad ash-Shehriy O‘zbekistonga qarshi kechadigan final bahsi oldidan o‘z fikrini bildirib o‘tdi.

"Finalgacha yetib kelganimiz uchun jamoam bilan faxrlanaman. Bu men uchun faoliyatimdagi ikkinchi final bo‘ladi. Finalda yaxshi o‘yin ko‘rsatib, uyga sovrin bilan qaytishga umid qilaman.

Finalda ham konsentrasiya saqlab qolishga va muvaffaqiyatli yurishimizni davom ettiramiz, deb umid qilyapman. Lekin bu final, unda hamma narsa ro‘y berishi mumkin. Ha, raqib gol urishi mumkin. Biz esa har qanday vaziyatga tayyorgarlik ko‘ryapmiz.

Ushbu avlod avvalgisidan farq qiladi. Biz bu jamoani so‘nggi 6 oy ichida tayyorlashni boshladik. Shunga qaramay, finalgacha yetib kelganimiz — bu juda yaxshi holat. Biz ko‘proq kelajakni ko‘zlab ishlayapmiz. Yaxshi avlodni shakllantirgan holda musobaqalarning yarim final yoki finaligacha yetib borishimiz zarur.

O‘zbekiston — kuchli jamoa. Ularning yaxshi o‘yin uslubi bor. Biz esa bunga tayyormiz. Ular anchadan beri ushbu jamoani tayyorlab kelishdi. O‘zbekiston bilan ikki marta to‘qnash kelganmiz. Ular bizni, biz esa ularni yaxshi bilamiz.

Yaxshi taktika va ruhiy ustunlik evaziga finalda g‘alaba qozonamiz, deb o‘ylayman. O‘yindan zavqlanib to‘p tepish biz uchun muhim ahamiyatga ega. O‘z xalqimiz va muxlislarimizni quvontirishni istayman. Bizga tushadigan bu bosim esa biz uchun foydali. Chunki o‘yinchilarda konsentrasiya va kurashga bo‘lgan chanqoqlik yuqori bo‘ladi", — dedi ash-Shehriy.