Саудия Арабистони U23 терма жамоаси бош мураббийи Саад аш-Шеҳрий Ўзбекистонга қарши кечадиган финал баҳси олдидан ўз фикрини билдириб ўтди.

"Финалгача етиб келганимиз учун жамоам билан фахрланаман. Бу мен учун фаолиятимдаги иккинчи финал бўлади. Финалда яхши ўйин кўрсатиб, уйга соврин билан қайтишга умид қиламан.

Финалда ҳам концентрация сақлаб қолишга ва муваффақиятли юришимизни давом эттирамиз, деб умид қиляпман. Лекин бу финал, унда ҳамма нарса рўй бериши мумкин. Ҳа, рақиб гол уриши мумкин. Биз эса ҳар қандай вазиятга тайёргарлик кўряпмиз.

Ушбу авлод аввалгисидан фарқ қилади. Биз бу жамоани сўнгги 6 ой ичида тайёрлашни бошладик. Шунга қарамай, финалгача етиб келганимиз — бу жуда яхши ҳолат. Биз кўпроқ келажакни кўзлаб ишлаяпмиз. Яхши авлодни шакллантирган ҳолда мусобақаларнинг ярим финал ёки финалигача етиб боришимиз зарур.

Ўзбекистон — кучли жамоа. Уларнинг яхши ўйин услуби бор. Биз эса бунга тайёрмиз. Улар анчадан бери ушбу жамоани тайёрлаб келишди. Ўзбекистон билан икки марта тўқнаш келганмиз. Улар бизни, биз эса уларни яхши биламиз.

Яхши тактика ва руҳий устунлик эвазига финалда ғалаба қозонамиз, деб ўйлайман. Ўйиндан завқланиб тўп тепиш биз учун муҳим аҳамиятга эга. Ўз халқимиз ва мухлисларимизни қувонтиришни истайман. Бизга тушадиган бу босим эса биз учун фойдали. Чунки ўйинчиларда концентрация ва курашга бўлган чанқоқлик юқори бўлади", — деди аш-Шеҳрий.