La Ligaga qaytgan "Valyadolid" himoyasini kuchaytirish niyatida.

UOL xabariga ko‘ra, klub 39 yoshli Dani Alvesh va 34 yoshli Marseloni o‘z safiga qo‘shib olishni rejalashtirgan.

Har ikki futbolchi ham klubning 51 foiz aksiyalariga egalik qiluvchi Ronaldoning iltimosiga ko‘ra jamoaga qo‘shilishi mumkin.

Manbaga ko‘ra, "Valyadolid" rahbariyati Marselo va Dani Alveshning maoshlari sezilarli darajada kamayishidan umid qilmoqda, chunki ispan klubi ularga avvalgi jamoalarda olganidek maosh to‘lashga qodir emas.

Marselo 2007 yildan beri "Real"da o‘ynab kelayotgan edi. Shu yozda braziliyalik erkin agent sifatida Madrid klubini tark etdi.

15 iyun kuni Alvesh "Barselona"ni tark etishini e’lon qildi. U ham shartnomasi tugagach, erkin agent sifatida ketadi.

"Valyadolid" 2021/22 yilgi mavsumda Ispaniya ikkinchi divizionida ikkinchi o‘rinni egallab, La Ligaga qaytdi.