Superliganing 13-turida “Paxtakor” mehmoni bo‘lib, ajoyib g‘alabani tantana qilgan Viktor Karpenko boshchiligidagi "Bunyodkor" a’zolari ayni paytda kichik ta’tilga chiqishgan. “Qaldirg‘ochlar” ikkinchi davraga tayyorgarlikni 8 iyuldan boshlaydi.

Futbolchilar shu kuni ertalab “Bunyodkor” akademiyasining tibbiyot markazida shifokorlar ko‘rigidan o‘tadi, tushdan so‘ng mashg‘ulotlar boshlanadi. Oradan uch kun o‘tib, ya’ni 11 iyul kuni yig‘in Belarus poytaxti Minsk shahriga ko‘chadi.

Jamoa 23 iyulga qadar davom etadigan yig‘in doirasida bir nechta o‘rtoqlik uchrashuvlarini o‘tkazishadi. O‘yinlardan biri 23 iyul kuni Belarusning "Isloch" klubiga qarshi o‘tkaziladi. "Isloch" rasmiy sayti tarqatgan xabarga ko‘ra, bahs mahalliy vaqt bilan 11:00da boshlanadi.

Ma’lumot o‘rnida. "Isloch" Belarus chempionatining joriy mavsumida 13-turdan so‘ng 22 ochko bilan 4-o‘rinni egallab turibdi.