«Bunyodkor» klubi Minskda yozgi o‘quv-mashg‘ulot yig‘inini o‘tkazib qaytdi. "Qaldirg‘ochlar" bosh murabbiyi Viktor Karpenko mazkur yig‘in haqida Belarus matbuotiga o‘z fikrini bildirib o‘tdi.

«O‘zbekiston milliy jamoasi tarkibiga qaraydigan bo‘lsak, 6-7 nafar o‘yinchi «Bunyodkor» tarbiyalanuvchisi hisoblanadi. Ha, bizning brend juda kuchli, ayniqsa Osiyoda. Jamoamiz Osiyo chempionlar ligasi yarim finaliga 2 marta chiqqan. O‘shanda yanada yaxshiroq natija qayd etishimiz mumkin. Hozirda esa juda yaxshi akademiyaga egamiz. Bu o‘z mevasini bermoqda.

Belarusda ko‘proq kuchga asoslangan futbol o‘ynaladi. Bizga qarshi o‘ynagan «Energetik-BGU» va «Arsenal» klublari jadvalda 2 va 3-o‘rinlarda borishmoqda. Hozir biz ikkinchi mavsumga tayyorgarlik ko‘ryapmiz. Shuning uchun turli taktikalarni sinovdan o‘tkazyapmiz.

Belarus chempionatiga doimo e’tibor qaratib kelganman. Bu yerdan yaxshi futbolchilar yetishib chiqadi. O‘z vaqtida juda ko‘p belaruslik futbolchilar Yevropaning top chempionatlarida o‘ynagan. Shuningdek, belaruslik murabbiylar yaxshi jamoalarda ishlashmoqda. Belarus futbol maktabi sobiq ittifoq mamlakatlar orasida eng yaxshilaridan biri», – dedi Karpenko.