Angliya va Germaniya o‘rtasidagi futbol bo‘yicha ayollar o‘rtasidagi Yevropa chempionatining final uchrashuvi 2022 yilda Britaniya va Germaniya televideniyesida eng ko‘p tomosha qilingan voqea bo‘ldi, deb xabar bermoqda Mirror.
Manbaga ko‘ra, Angliyaga qarshi final o‘yinini kuzatgan nemis teletomoshabinlarining eng yuqori auditoriyasi 17,9 million kishini tashkil qilgan. Angliyada eng yuqori auditoriya 17,4 million kishini tashkil etdi. Shuningdek, translyasiyani striming xizmatlarida yana 5,9 million kishi tomosha qilgani qayd etilgan.
Shu tariqa, ayollar o‘rtasidagi Yevropa chempionati finali yilning eng ko‘p tomosha qilingan teleko‘rsatuvlari qatoridan joy oldi. Eslatib o‘tamiz, Angliya terma jamoasi turnir finalida Germaniya terma jamoasini qo‘shimcha vaqtlarda 2:1 hisobida mag‘lub etib, ilk bor ayollar o‘rtasidagi Yevropa chempionatida g‘olib chiqdi.
