O‘FA birinchi vise-prezidenti Ravshan Irmatov boshchiligidagi mutaxassislar hududlardagi futbol ommaviyligini oshirish, bolalar-o‘smirlar futbolini yanada rivojlantirish bo‘yicha amalga oshirilayotgan ishlar bilan tanishish maqsadida Qoraqalpog‘iston Respublikasiga tashrif buyurishdi.
Tashrif avvalida Nukus shahrida joylashgan “Turon” stadionining hozirgi holati va sun’iy maydonining sifati ko‘zdan kechirildi. Bundan tashqari, futbol akademiyasi uchun mazkur hududda joylashgan zaxira maydonlari loyihasi o‘rganildi. Akademiya hamda sport maktablari yotoqxonalari, oshxona va boshqa inshootlar qurilish-rekonstruksiya loyihalari bilan yaqindan tanishildi. Qurilish davom etayotgan joylarda quruvchi tashkilot vakillariga xalqaro standartlar yuzasidan kerakli tavsiyalar berildi.
Shundan keyin, O‘FA mutasaddilari va mahalliy mutaxassislar ishtirokida Qoraqalpog‘iston miqyosida bolalar futbolining infrastrukturasi yuzasidan fikr almashildi. Kegayli, Bo‘zatov va Qorao‘zak tumani bolalar-o‘smirlar sport maktablari murabbiylari va tarbiyalanuvchilari bilan uchrashuv bo‘lib o‘tdi. O‘lkada iste’dodli yoshlar ko‘p ekanligi, ularni to‘g‘ri yo‘naltirib, zamonaviy metodika asosida katta futbolga tayyorlash lozimligi, bu borada hududda imkoniyat yetarli ekanligi va uni yanada yaxshilash kerakligi ta’kidlandi.