“Andijon” – “Turon” (1:0) jamoalari o‘rtasidagi bellashuvdan keyin o‘tkazilgan matbuot anjumanida dastlab mehmonlar bosh murabbiyi Anvar Berdiyev ishtirok etdi.

— O‘yinga kelsak, “Andijon” jamoasini g‘alaba bilan tabriklayman.  Biz kutgan narsa yana sodir bo‘ldi. Mashg‘ulotlarda standart vaziyatlarga ko‘p e’tibor bergandik. Baribir standartdan gol o‘tkazib yubordik. Bu o‘yinni ko‘rib, tahlil qilamiz. Keyingi o‘yinimiz Kubok bahsida yana “Andijon”ga qarshi. Pro ligada hali hech narsa aniq bo‘lgani yo‘q. Hayot davom etadi. Ushbu uchrashuvni chuqur tahlil qilib, keyingi bahsga tayyorgarlikni boshlaymiz.

— “Turon” oldingi uchrashuvlarda yaxshi natijalar qayd etayotgandi. Lekin bugun “Andijon” bilan o‘yinda jamoa o‘ziga o‘xshamadi. Nima yetishmadi? Yoki jamoangizni bori shumi?
—  Futbolda har doim ham siz o‘ylagan narsa bo‘lmaydi. Balki futbolchilarimiz o‘yinga qattiq tayyorgarlik ko‘rganidan o‘yinimiz chiqmagandir. O‘zim ham birinchi bo‘limda jamoamni tanimadim. Goldan keyin ikkinchi bo‘limda jamoamiz biroz o‘z o‘yinini namoyish etishni boshladi. Oxirgi daqiqalarda hisobni tenglashtirish uchun vaziyatlar bo‘ldi. Humoyun Murtazoyev va Aziz Ibragimov vaziyatdan foydalanganida balki durang bo‘lishi ham mumkin edi. Yigitlar bilan gaplashamiz. Yana qaytaraman: bu o‘yinni ko‘rib, tahlil qilib, keyingi uchrashuvga tayyorgarlikni boshlaymiz.

— Asosiy hujumchi Humoyun Murtazoyev “yo‘qolib” qoldi. Bunga sabab nima?
— Bunday deb o‘ylamagan bo‘lardim. “Andijon”ning himoya chizig‘i ancha shakllangan, yaxshi futbolchilardan iborat. Murtazoyevga ham qiyin bo‘ldi. Shunga qaramasdan o‘ziga imkoniyat yaratdi. Yodingizda bo‘lsa, birinchi davradagi o‘yinda ham Murtazoyevda ajoyib imkoniyat bo‘lgandi, ammo gol urolmagandi. Bugun ham imkoniyat yaratdi, ammo foydalana olmadi. Hujumchi qachon ko‘rinadi? Qachonki, gol ursa. Gol urmasa, maydonda ko‘rinmaydi.

— Birinchi davrada “Andijon” standart vaziyatdan foydalanib g‘alaba qozongandi. Bugun ham shunday bo‘ldi. Aynan shu narsa ustida “Turon”da ish olib borilmadimi?
— Men bunday deb aytmagan bo‘lardim. Bunday vaziyatlarga ko‘p e’tibor berib, mashg‘ulotlarda ham ishladik. Xohlaymizmi-yo‘qmi, futbolchilarni o‘sha daqiqalardagi harakati ko‘p narsani hal qiladi. Gol o‘tkazilgan vaziyatda futbolchimiz Mamatkazin bilan oxirigacha kurash olib bormadi. U to‘pni tashlab berdi, “Andijon” jamoasi gol urib ketdi. Hamma narsani maydonda futbolchilar hal qilishadi. Bitta vaziyat golga aylantirildi.

“Andijon” matbuot xizmati.