"Manchester Yunayted" hujumchisi Krishtianu Ronaldu yozda jamoani tark etishi mumkinligi haqidagi mish-mishlar yuzasidan bayonot berdi.
Oldinroq 37 yoshli portugaliyalik futbolchiga "Bavariya" va "Atletiko"dan qiziqish borligi haqida xabarlar tarqalgan edi. Shuningdek, "Manchester Yunayted" futbolchi bilan shartnomani bekor qilishi mumkinligi haqida ham ma’lumotlar paydo bo‘ldi.
“Ommaviy axborot vositalari yolg‘on gapirmoqda. Bir-ikki hafta ichida men bilan suhbat chiqqanida hamma haqiqatni bilib oladi. Oxirgi oylarda men haqimda chiqqan 100 ta yangilikdan faqat 5 tasi haqiqat edi. Endi tasavvur qiling-a, vaziyat qanday”, - deb yozdi Ronaldu ijtimoiy tarmoqlardagi muxlislar akkaunti posti ostidagi izohlarda.
Ronaldu 2021 yilning avgustida "Manchester Yunayted"ga qaytdi, u avvalroq 2003 yildan 2009 yilgacha Angliya jamoasida o‘ynagan. O‘tgan mavsumda portugaliyalik futbolchi jamoa safida barcha musobaqalarda 39 ta o‘yinda maydonga tushib, 24 ta gol urdi va 3 ta golli uzatmani amalga oshirdi.
2022/23 yilgi mavsum boshlanishidan oldin Ronaldu bir necha bor "Manchester Yunayted" mashg‘ulotlarini o‘tkazib yuborgan va u jamoa bilan mavsumoldi safariga ham bormagan. Iyul oyi oxirida u klubga qaytdi va mashg‘ulotlarga kirishdi. Joriy mavsumda hujumchi 2 ta uchrashuvda qatnashib, gol ura olmadi.
Transfermarkt.com saytida Ronaldu 30 million yevroga baholangan.
