"So‘g‘diyona" klubi bosh murabbiyi Ulug‘bek Baqoyev OFK kubogi doirasida "Xo‘jand"ga qarshi bo‘lib o‘tgan bahs (4:0) borasida o‘z fikrlari bilan o‘rtoqlashdi.

"Iqlim sharoiti tufayli o‘yin qiyinchilik tug‘dirdi. O‘yinchilar issiq havoda qiynalishdi. Biz esa yaratilgan vaziyatlardan unumli foydalanib, birinchi bo‘limda 3ta gol urib oldik. Bu esa imkoniyatlarimizni oshirdi. Ikkinchi bo‘limda bir nechta o‘zgarishlar qilganimizdan keyin o‘yinimiz yana yaxshilandi. O‘yin uchun yutbolchilarga minnatdorchilik bildiraman. Shuningdek, muxlislarimizga ham rahmat aytmoqchiman.

O‘ng qanotda o‘ynaydigan himoyachimiz diskvalifikasiya qilingani uchun Vitaliy Denisovni o‘ng tomonda o‘ynatdim. Nazarimda, u juda yaxshi o‘ynadi. Professional futbolchi, ehtiyoj tug‘ilsa, maydonning har qanday nuqtasida o‘ynashni bilishi kerak.

Har bir o‘yinda xatolarga yo‘l qo‘yiladi. Uyga qaytganimizdan keyin ularni tahlil qilamiz va tegishli xulosalarni chiqaramiz", — dedi Baqoyev.