Jahon futbolidagi transfer rekordi braziliyalik Neymarga tegishli ekanligi barchaga ma’lum - 222 million yevro.
«PSJ»ning yana bir xaridi - Kilian Mbappe umumiy reytingning 2-qatorida. Qiziq, muayyan operasiya emas, futbolchilarning butun faoliyatidagi barcha transferlarni umumlashtirsak, qanday holat yuzaga keladi? Transfermarkt portali ma’lumotlari bo‘yicha aytsak, bu borada yaqinda «Inter»ga qaytgan Romelu Lukaku mutlaq peshqadam. Diqqat qiling, klublar belgiyalik hujumchini sotib olish yo‘lida jami 333,56 mln. yevro sarflagan.
Argentinalik Ernan Krespo faoliyatida 4ta transfer kuzatilgan. Yo‘nalish: «River Pleyt» - «Parma» - «Lasio» - «Inter» - «Chelsi». Xullas, Italiya va Angliya klublari sobiq hujumchiga jami 126,94 mln. yevro sarflashgan - bu barcha transferlarning jami summasi bo‘yicha tarixdagi 15-ko‘rsatkichdir. Reytingning 14-qatoridan joy olgan Joau Felishga taalluqli summa (127,2 mln. yevro) atigi 1ta o‘tish mahsuli hisoblanadi. Eslatma, «Atletiko» portugaliyalik iqtidor uchun «Benfika»ga shuncha to‘lagandi. 13-o‘rinda kolumbiyalik Xames Rodriges bormoqda - jami 148,53 mln. yevro. Kolumbiyalik futbolchi bu summani 6ta transferda yig‘di. Eng kattasi - «Monako»dan «Real»ga 75 mln. yevro evaziga o‘tgani. Jarohatlar ta’qibidan sira qutulolmaydigan belgiyalik Eden Azar hayotida atigi 2ta transfer bor, lekin ularning summasi chakki emas - 150 mln. yevro. Ma’lumot uchun, u «Real» libosini kiyishiga qadar «Lill» - «Chelsi» yo‘nalishi bo‘yicha harakatlangan edi. Jadvalning 11-qatori Argentina futbolining yana bir vakiliga tegishli: Gonsalo Iguain 5ta transfer operasiyasida jami 159 mln. yevroga baholangan. To‘g‘ri, bu summaning katta qismi - 90 millioni «Yuventus» tomonidan to‘langan.
Kuchli 10talikni fransiyalik Antuan Grizmann ochib beradi - 160 mln. yevro. Hammasi oddiy: unga «Barselona» 120 million, «Atletiko» avvaliga 30 million («Real Sosyedad»ga), keyin yana 10 million (ijarasi uchun «Barselona»ga) to‘ladi. Jahongashta Zlatan Ibragimovich jami 169,1 mln. yevro bilan 9-o‘rinda. Mag‘rur Ibra klublarni naq 7 marta o‘z transferiga pul sarflashga majbur qildi. Deyarli 170 «limon»ga teng xirmonda eng katta ulush «Barselona» chekida (qariyb 70 mln. yevro). 175 mln. yevro - bu atigi 2ta o‘tish mahsuli. Dortmund «Borussiya»si va «Barselona» Usmon Dembele transferiga birgalikda shuncha sarfladi - 8-pozisiya. Anxel di Mariya faoliyatida o‘tishlar yetarli, lekin jami 179 mln. yevro asosan 2ta katta transfer tufayli yuzaga keldi. Ya’ni argentinalik xaridiga avvaliga «MYU», keyin «PSJ» katta mablag‘ sarfladi. Di Mariyadan oldinda Kilian Mbappe bor. Eslasangiz, «PSJ» fransiyalik iqtidor uchun «Monako»ga 180 mln. yevro berishdan o‘zini to‘xtatolmagandi. Qisqasi, Kilian bittagina kuchli «sakrash» tufayli 6-o‘rinda.
Kuchli 5talikka yetib keldik. Beshinchi qator APLdan boshqa ligada o‘zini «topolmagan» Filippe Koutinyoga tegishli. Braziliyalik yarim himoyachi faoliyati davomida ko‘p marta jamoa almashtirdi, lekin umumiy summa (180,3 mln. yevro)da himmatli «Barselona»ning o‘rni katta. Kata-loniyaliklar uning uchun «Liverpul»ga 135 mln. yevro to‘lashgan edi. Xuddi Koutinyo kabi liga «tanlash» bilan ovora Alvaro Morata reytingning 4-qatorida - 189 mln. yevro. Bu 6ta o‘tish mahsuli bo‘lib, 66 millioni birgina «Chelsi» bo‘ynida. Nihoyat, Krishtianu Ronaldu. Portugaliyalik yulduzga daxldor ko‘rsatkich - 245 mln. yevro. Hamma biladi, Krishning faoliyatida 2tagina yirik transfer bo‘ldi (hozircha): «MYU» - «Real» (94 mln. yevro) va «Real» - «Yuventus» (117 mln. yevro). Muayyan transfer bahosi bo‘yicha jahon rekordchisi Neymar xaridlarning umumiy summasiga ko‘ra, 2-o‘rinda. 310 mln. yevroda «PSJ»ning qalin (222 «limon») va «Barselona»ning nisbatan nozikroq «imzo»si bor. 333,56 mln. yevro - klublar Romelu Lukaku transferiga jami shuncha sarfladi. Belgiyalik hayotida o‘tishlar ko‘p, hammasining summasi ancha katta. Eng ko‘p xarajat esa «Chelsi» zimmasida (113 mln. yevro).
Ravshan IBROHIM tayyorladi
