O‘zbekiston kubogi nimchorak finalidan o‘rin olgan “Olimpik” – “Navbahor” (0:1) bahsidan keyingi matbuot anjumanida mezbonlar bosh murabbiyi Timur Kapadze ishtirok etib, jurnalistlarning savollariga javob berdi. Timur Tohirovich o‘z so‘zini o‘yin haqidagi fikrlari bilan boshladi. 

- Yaxshi o‘yin bo‘ldi, ikkala jamoa ham yaxshi harakat qildi. Afsuski, mag‘lubiyatga uchradik. Shunga qaramasdan yigitlar ajoyib o‘ynashdi. To‘g‘ri, golni o‘zimizga-o‘zimiz olib keldik. Yo‘q joydan deyarli sovg‘a qildik. “Navbahor”da tajribali futbolchilar bor. Ular imkoniyatdan yaxshi foydalanishdi. Shundan keyin ozgina uzilish bo‘ldi. Uchrashuvning ikkinchi bo‘limida yaxshi imkoniyatlarga ega bo‘ldik. Gol urolmagandan so‘ng, endi gapirishning hojati yo‘q. Mag‘lubiyatga uchradik. Statistikaga qarasak, bitta zarba bo‘ldi va o‘sha golga aylandi. Bu albatta biroz yoqimsiz vaziyat. Umuman olganda, yigitlarimiz ajoyib tajriba to‘plashyapti. Nafaqat bizga, balki raqib jamoaga ham foydali bo‘lyapti. Murabbiylarga bosh qotirishiga ancha narsa beryapmiz. “Navbahor”ni tabriklayman. Menimcha, muxlislarimiz ham bor shekilli, kelishyapti, bizni qo‘llab-quvvatlashyapti, ularga katta rahmat. Ular yaxshi futbol ko‘raman deb kelishyapti. To‘g‘ri yo‘ldan ketyapmiz.

- “Olimpik” ikkinchi bo‘limda hujumkor o‘yin namoyish etdi. Ikkita penaltili vaziyat bo‘ldi - 50x50. Bu boradagi fikringiz qanaqa?

- Hali takroriy vaziyatni ko‘rmadim. Bir qaraganimda, menga penaltidek tuyuldi. Tegdimi-tegmadimi, buni takroran ko‘rish kerak. Hakam o‘sha vaziyatga yaqinroq edi. Hozir bir narsa deyishim qiyin. Demak, futbolchi yaxshi o‘xshata olmabdi (kuladi).

- Statistika haqida gapirdingiz. Ha, “Navbahor” bitta zarbadan bitta gol urgan. Ammo “Olimpik” ham birinchi bo‘limda birorta aniq zarba yo‘llay olmagan. Bu raqib jamoangizni yaxshi o‘rganganidan dalolatmi yoki taktikangiz “ishlamagani”danmi?

- Raqib ko‘pchilik bo‘lib himoyalandi. Bo‘shliqlar topish qiyin edi. Sababi shunda. Ammo bugun biz g‘alaba qozonish uchun yetarlicha xavfli vaziyatlarni yaratdik. Ikkinchi bo‘limda ikkita 100 foizli imkoniyatimiz bor edi. Raqib deyarli himoyada zich harakat qildi. Futbolchilari jismoniy tomondan ham, tajriba borasida ham yaxshi. Ammo shogirdlarim ulardan jismoniy tomondan ham ustun bo‘ldi.

- Hujumga oxirgi nuqtani qo‘yishda nima yetishmadi, deb o‘ylaysiz?

- Qayerdadir shoshilishyapti, qayerdadir aniq zarba berishga mahorat yetmayapti. Menimcha, tajribali futbolchilarda ham bunday imkoniyatlardan foydalana olmaydigan paytlari bo‘ladi. Qayerdadir bosim xalaqit qilyapti. “Navbahor” bugun bizga vaziyatlarni yo‘qqa chiqarishga harakat qildi.

- Birinchi bo‘limda uzoq masofalarga paslar uzatildi. Ikkinchi bo‘limda qisqa to‘p uzatishlari bo‘ldi. Bu sizning ko‘rsatmangizmidi?

- Birinchi bo‘limni ham yaxshi boshladik. Goldan keyin uzatmalarga o‘tildi. Bu “Navbahor”ga qo‘l keldi. Birinchi bo‘limda ham aytishga harakat qildim, eshitishmadi. Ikkinchi bo‘limda tushuntirdim. Keyin uzatmalarni tayyorlab amalga oshirdik. Qolgan vaziyatlarda pas orqali chiqishga urindik.