Kecha, 23 avgust kuni «Dinamo» jamoasi a’zolari va klub muxlislari o‘rtasida ochiq suhbat shaklidagi uchrashuv o‘tkazildi.

«Dinamo» jamoasining Superliga doirasidagi qoniqarsiz natijalari samarqandlik muxlislarni tashvishlantirayotgani hech kimga sir emas. Jamoaning jonkuyar va faol muxlislari klubning qiyin vaziyatdan chiqib ketish va keyingi rejalarini muhokama qilish uchun klub rahbariyati, murabbiy va futbolchilar bilan uchrashishni so‘ragan edi. Ularning talab va istaklarini inobatga olgan holda «Dinamo» stadioni markaziy tribunasida jamoa rahbariyati, murabbiy, futbolchilar va ishqibozlar ishtirokida yig‘ilish o‘tkazildi.

Ochiq suhbat va tanqidiy ruhda o‘tgan uchrashuvda muxlislar qiyin vaziyatda bo‘lgan «Dinamo»da ish boshlagani uchun bosh murabbiy Vadim Abramovga minnatdorchilik bildirib, klubning Superligada qolishi imkoniyati haqida so‘rashdi.

«Jamoaning qabul qilganimga ko‘p bo‘lmadi va bu yerda ish boshlayotganda ham mendan bu haqda so‘rashganida «Menga uchta o‘yin bering, qo‘l ostimda qanday jamoa borligini ko‘ray, keyin savolingizga javob beraman», degan edim. Hozircha «So‘g‘diyona» va «Qizilqum»ga qarshi ikki o‘yin o‘tdi, oldinda esa yana bitta bahs «Bunyodkor» bilan o‘tadi. Ushbu uchrashuvdan keyin sizning savolingizga javob berishim mumkin. Bu o‘yindan keyin bu savolga o‘zingiz ham javob topishingiz mumkin bo‘ladi.

«Dinamo»ning ikkinchi davra startini muvaffaqiyatsiz boshlaganini, turnir jadvali yetakchilari - «Paxtakor», «Nasaf», «So‘g‘diyona» va «Qizilqum»ga qarshi o‘yin o‘tkazgani bilan bog‘lash, bahonadek ko‘rinishi mumkin. Men uchun kim bilan o‘ynash emas, biz qanday o‘ynashimiz muhimroq. Hozirda o‘yin va natija jihatdan yaxshi ko‘rinmayotganimiz barchaga ayon. Eng avvalo shuni to‘g‘rilashimiz kerak. Oldinda 10ta o‘yinimiz bor va bu biz uchun imkoniyat. Ligada qolish uchun shundan kamida 5tasini yutishimiz shart. Aks holda vazifani bajarib bo‘lmaydi. Hozir sizga ko‘p va’dalar berishim mumkin, ammo tushuning, men sehrgar emasman. Vaziyatni yaxshi tomonga o‘zgartirish, ligada qolish uchun barchamiz bor kuchimiz bilan ishlaymiz. Bu futbol, oldinda nima bo‘lishini bilmaysan», - dedi Vadim Karlenovich (https://t.me/FCDinamo1960/11449).

Muxlislar bilan uchrashuvda O‘zbekiston milliy jamoasi sobiq ustozi Samarqandda eng avvalo futbol infratuzilmasini yaxshilash, mashg‘ulot maydonlari ko‘paytirish kerakligini aytib o‘tdi.

«Samarqandda futbol infratuzilmasini yaxshilash lozim. Mashg‘ulot maydonlari bo‘lmasa, yosh futbolchilarning o‘sib kelishi qiyin bo‘ladi. Aynan shunga ham e’tiborni kuchaytirish kerak. Bu muammo faqat Samarqandda emas, Toshkentda ham xuddi shu ahvol. Futbol poydevori yaxshilanmasa, keyinchalik klublarda men yoki Mourinyo kelib ishlaydimi farqi yo‘q – natija ko‘rsatish qiyin», - deydi Karlenovich.

Muxlislar tomonidan jamoa legionerlari – darvozabon Miloye Prekovich va Mixaylo Yovanovich 1-davrada yaxshi o‘yin ko‘rsatgani, 2-davrada esa negadir ularga ishonch bildirilmayotgani haqidagi savolni ham murabbiy javobsiz qoldirmadi.

«Jamoaga kelganimda ular o‘ynamayotgan edilar. Yovanovich jarohatidan keyin bugundan mashg‘ulotlarga kirishdi, Prekovich ham mashg‘ulotlarda ishlamoqda, ko‘ramiz, u ham asosiy tarkibga qaytishi mumkin», - dedi murabbiy.

Shuningdek, muxlislar himoya va darvoza chizig‘idagi qo‘pol xatolar haqida gapirib, tarkibda rotasiya qilish borasida savol berishdi, murabbiy esa himoya chizig‘i nozik nuqta bo‘lib turganini tan oldi va o‘zgarishlar qilinishi mumkinligini bildirdi.

Qizg‘in savol-javoblar ostida o‘tgan uchrashuvda «Dinamo» bosh direktori Uchqun Qobilov hamda Erkin Boydullayev, Mixaylo Yovanovich, Marat Bikmayev, Elguja Grigalashvili singari tajribali futbolchilar o‘z fikrlarini bildirib, muxlislarga qo‘llab-quvvatlash uchun minnatdorchilik bildirgan holda jamoa va muxlislar bir kuchga aylansa, «Dinamo»ni Superligada olib qolish uchun oxirigacha kurashishga va’da berishdi.