21 avgust sanasidan e’tiboran mamlakatimiz futbolida nufuzi jihatidan ikkinchi o‘rinda turuvchi O‘zbekiston kubogi bahslarining pley-off seriyasi bahslari start oldi. Olimpiya tizimida davom etuvchi ikkinchi bosqichda g‘alaba qozongan jamoalar kurashni davom ettirishadi. Mag‘lubiyatga uchragan jamoalar esa bahsdan chiqib ketishadi.

Bu yil Kubok bahslari yo‘lga qo‘yilganiga 30 yil bo‘ldi. O‘zbekiston XXX kubogi musobaqasida Superliga, Pro liga va Birinchi liga jamoalari ishtirokini boshlagan edi. Avvaliga o‘tish musobaqasi, keyin guruh bosqichi o‘yinlarida nimchorak finalda bahs yurituvchi 16 jamoaning nomi aniqlandi. Har bir bosqichdan so‘ng raqiblar qur’a tashlash yo‘li orqali aniqlab borilayapti. Chorak final juftliklari uchun qur’a tashlash jarayoni nimchorakning AGMK – “Metallurg” jamoalari uchrashuvi tanaffusida o‘tkazilishi oldindan belgilab qo‘yilgan.

O‘zbekiston kubogini eng ko‘p qo‘lga kiritgan jamoa “Paxtakor” sanaladi. “Sherlar” 13 marta kubokni boshlari uzra baland ko‘tarishgan. Toshkentning “Bunyodkor” jamoasiga kubok 4 marta nasib etgan bo‘lsa, Namanganning “Navbahor” hamda Toshkentning “Lokomotiv” jamoalari 3 martadan kubok sohiblari bo‘lishgan. Farg‘onaning “Neftchi” jamoasi 2 marta, “Do‘stlik”, “Nasaf” va AGMK jamoalari 1 martadan kubokka sazovor bo‘lishgan. Mazkur jamoalardan tashqari “Temiryo‘lchi” (Qo‘qon), “Yangiyer”, MHSK, “Dinamo” (Samarqand), “Traktor” (Toshkent), “Mash’al” va “Sho‘rtan” jamoalari O‘zbekiston kubogining finalida o‘ynagan.