"Liverpul" Premyer-ligani dahshatli boshladi va dastlabki uchta o‘yinda g‘alaba qozona olmadi. Yurgen Klopp shogirdlari allaqachon “Manchester Siti”dan 5 ochko ortda qolmoqda. "Stadion.uz" internet nashri sodir bo‘layotgan voqealar haqida fikr yuritadi.
Premyer-liga mavsumi boshlanishi arafasida hamma chempionlik uchun “Liverpul” va “Manchester Siti” o‘rtasidagi navbatdagi qiziqarli musobaqani intiqlik bilan kutayotgandi. Qolaversa, mersisaydliklar mamlakat Superkubogi uchun o‘tkazilgan to‘qnashuvda g‘alaba qozonishdi. Biroq, Yurgen Klopp shogirdlari uchun start yaxshi chiqmadi: 2 durang, 1 mag‘lubiyat va Xosep Gvardiola jamoasidan 5 ochko ortda qolyapti. "Liverpul"ning muvaffaqiyatsizligining sabablari nimada?
Jarohatlar
"Liverpul"da "Manchester Yunayted"ga qarshi o‘yinda butun boshli asosiy tarkib ishtirok eta olmadi. Bundan tashqari, tarkib hatto Angliya Premyer-ligasi standartlari bo‘yicha ham jangovar emasdi: Kelleher, Kelvin Ramsay, Ibrahima Konate, Joyel Matip, Kertis Jones, Tiagu Alkantara, Aleks Oksleyd-CHemberlen, Nabi Keyta, Kayd Gordon, Diogo Jota jarohat olgan futbolchilar. Bu ro‘yxatga Darvin Nunyesni ham qo‘shamiz. Urugvaylik jarohat olgani yo‘q, faqat o‘zining ahmoqligi tufayli diskvalifikasiya qilingandi.
Yurgen Klopp mavsum boshida jiddiy kadrlar muammosiga duch keldi. "Manchester Yunayted"ga qarshi o‘yinda hujumkor guruhdan faqat Fabio Karvalyu zaxira o‘rindig‘ida o‘tirdi.
Keyta allaqachon umumiy guruhda. Jota va Jons oy oxirigacha mashg‘ulotlarga qaytishlari mumkin, Tiago, Matip va Konate kamida sentyabr oyining o‘rtalariga qadar, Oksleyd-CHemberlen esa bundan ham uzoqroq muddatga safdan chiqqan.
Yarim himoyadagi turg‘unlik
Ko‘pgina tahlilchilar uzoq vaqtdan beri "Liverpul"ga yarim himoyada yangi qon kerakligini aytishmoqda. Ammo Klopp bunga rozi emas va klub bu yozda yarim himoyani kuchaytirishga intilmadi va bu behudaga o‘xshaydi. Ochilish o‘yinlarida ijodkorlik yo‘qligi ko‘zga tashlandi. Jeyms Milner, xuddi Jordan Xenderson kabi yugurishda davom etmoqda, ammo ular hech qachon o‘zlarining kreativ o‘yinlari bilan tanilgan emaslar.
"Liverpul" tabiiy ravishda yarim himoyani yangilamoqchi, ammo o‘sha Karvalyo va Elliott ularga jiddiy ishonish uchun hali juda yosh. "Liverpul" behuda transferlarni amalga oshirmagani bilan faxrlanadi. Biroq, so‘nggi ikki yil ichida hujumda ular kelajak uchun yangi to‘laqonli trioni yig‘ishdi (hech bo‘lmaganda qog‘ozda). Shu bilan birga yarim himoyada 36 yoshli faxriy va jiddiy tajribaga ega bo‘lmagan bir qancha yoshlar o‘ynashadi.
Manening yetishmasligi
Yozda Manening ketishi hal qilib bo‘lmaydigan muammoga o‘xshamasdi, ammo hozir mavsum boshlandi va uning yo‘qligi juda sezilarli. Bunga qisman Jotaning jarohati va Darvinning diskvalifikasiyasi sabab bo‘ldi, buning natijasida Klopp hujumda cheklangan sonli o‘yinchilar bilan qoldi.
Nunyes o‘z iqtidorini namoyon etdi va "Enfild"da uning uchun hammasi yaxshi bo‘lishiga ishonch bor. Biroq, hujumni qayta qurish vaqt talab etadi.
Yetakchilarning yomon o‘yini
“Liverpul” yetakchilari mavsum boshida yomon ahvolda edi. Virjil van Deykni Aleksandr Mitrovich birinchi turda qanday sport fotmasida ekanligini ko‘rsatib berdi. Keyin uchrashuvda Jeydon Sancho ham Van Deykning xatosidan foydalanib ketdi.
"Liverpul" mavsumga tayyor emasdek ko‘rinyapti. Klopp jarohat olgan futbolchilarning qaytishini kutmoqda, ammo asosiy muammo ularning formasida. Mersidadiyaliklar zudlik bilan formaga kirishlari kerak, hozircha jamoa o‘ziga o‘xshamaydi va bu juda katta muammo.
Psixologik bo‘shliq
Aslida “Liverpul” qanday psixologik holatda ekani katta savol. O‘tgan mavsumda jamoa to‘rtta kubokda g‘alaba qozonishni orzu qilgan, biroq bor-yo‘g‘i ikkita sovrin bilan cheklanib qolgandi. Boz ustiga, mersisaydliklar ikkita yirik turnirda mag‘lub bo‘lishdi. O‘tgan mavsumda Klopp shogirdlari borlarini berishdi, ammo muvaffaqiyatga erisha olishmadi. Jamoada hozir ham shunday munosabat bormi, degan katta savol bor.
Hozir jamoada nimadir bo‘layotgani aniq. Ba’zi o‘yinchilar ketishni xohlashadi, boshqalari qolib, bir-birlariga so‘kinadilar. "Liverpul" zudlik bilan tinchlanib, o‘zini yig‘ib olishi kerak. Keyingi turda raqib "Bornmut" bo‘ladi - xotirjam g‘alaba qozonish va erkin nafas olish uchun ajoyib imkoniyat.
