O‘zbekiston U-19 terma jamoasi bosh murabbiyi Farhod Nishonov «Shizuoka» klubi ustidan qozonilgan g‘alabadan so‘ng o‘z fikrlarini bildirib o‘tdi.

"Avvalambor, o‘sib kelayotgan yosh futbolchilarimizni Yaponiyadagi turnirga yuborishda jonbozlik ko‘rsatgan O‘FAga rahmat aytmoqchiman. Musobaqa haqida to‘xtaladigan bo‘lsak, tashkilotchilik jihatdan hamma narsa a’lo darajada. Xususan, bugungi o‘yin ham qiziqarli o‘tdi. «Shizuoka» klubi kuchli jamoa ekanligini namoyish eta oldi. Bizning futbolchilarimizda o‘yinning ilk daqiqalaridanoq biroz hayajon va bosim bo‘ldi. Chunki stadionga minglab mahalliy muxlislar tashrif buyurib, o‘z jamoasini qo‘llab turgan edi. Bu esa yirik turnirlarda, minglab muxlislar qarshisida kam o‘ynagan har qanday futbolchiga ta’sir qilishi turgan gap.

Bo‘lim boshida biroz qiynaldik, lekin sekin-sekin o‘yinni tiklab, hammasini o‘z nazoratimizga olishga harakat qildik. Futbolchilarim hisobda orqada qolayotib ham chiroyli o‘ynab, penaltilar seriyasiga yetib keldi. Yakunda esa 2 ochkolik bo‘ldik. Bu bilan to‘xtab qolmoqchi emasmiz. Oldinda bizni qiziqarli va qiyin bo‘lgan uchrashuvlar kutib turibdi. Barchaga rahmat aytib qolaman", — dedi Nishonov.