Hozirda ishsiz yurgan taniqli murabbiylar ro‘yxati juda uzun.
Deylik, Germaniya milliy jamoasi boshqaruvida katta natijalarga erishish asnosida kimligini isbotlagan Yoaxim Lyov 1 yildan oshdiki, klublar takliflarini o‘rganish bilan band. Xo‘sh, yana kimlar bo‘sh yurishibdi?
Zayniddin ZIDAN. Buyuk Zizuning Fransiya milliy jamoasi va «PSJ»da ish boshlashi haqidagi gap-so‘zlar amalga ko‘chganicha yo‘q. Xullas, Zidan 2021 yilning may oyidan buyon bo‘sh murabbiy maqomida.
Maurisio POCHETTINO. Argentinalik mutaxassis mavsum-2021|2022 yakunida «PSJ» bilan xayrlashgani bo‘yicha hamon ta’tilda. Hozircha uning qachon ishga qaytishi haqida aniq ma’lumot ham yo‘q.
Yoaxim LYOV. 2021 yilning yozidan buyon hordiq chiqarayotgan yana bir murabbiy. Vaholanki, Lyov Germaniya milliy jamoasidagi missiyasini tugatgan vaqtdayoq OAVda uning oldida klub futboli yo‘nalishida ishlash uchun aniq takliflar yetarli ekanligi haqida yozilgandi.
Rafael BENITES. Ispaniyalik mutaxassis 16 yanvar kuni «Everton» bosh murabbiyi lavozimidan iste’foga chiqarildi. 7 oydan oshdiki, Benites yangi ish joyi topganicha yo‘q.
Ole-Gunnar SULSHER. 2021 yilning noyabrida «MYU» boshqaruvini topshirgan norvegiyalik murabbiy ham «uyqu»da. Uning ta’tili qancha davom etadi, aytish qiyin... Hozircha 1 yilga qarab ketyapti.
Marselo BYELSA. Joriy yil fevralda «Lids» bilan xayrlashgan mutaxassis. Insayderlar yoz bo‘yi argentinalikni «Atletik» bilan bog‘lashdi, biroq Bilbao klubi yakunda bosh murabbiy roliga Byelsani emas, Ernesto Valverdeni tanladi.
Andre VILLASH-BOASH. Portugaliyalik mutaxassis 2021 yili «Marsel» bilan mojaroli tarzda orani ochiq qildi. Shu-shu uning xizmatiga munosib qiziqish yo‘q.
Klaudio RANYERI. 2022 yilning boshida «Uotford»dan ketgan italyan. Bahorda Ranyeri Italiya milliy jamoasida Roberto Manchini o‘rnini egallashi mumkinligi haqida xabarlar urchidi, lekin hammasi gap-so‘z maqomida qoldi…
