“Mash’al”ga qarshi bahsda o‘z darvozasini ishonchli himoya qilib, g‘alabaga munosib hissasini qo‘shgan "Andijon" posboni Xurshid Xo‘jayev o‘z fikrlarini bildirib o‘tdi.

"Birinchi navbatda g‘alaba qozonganimiz uchun Xudoga shukr. “Mash’al” bilan qiyin bo‘lishini bilardik va rostdan ham shunday bo‘ldi. Murabbiylar ham uchrashuvdan avval bizga “Mash’al”ni kuchli va kuchsiz tomonlarini ko‘rsatib, bizni o‘yinga tayyorlashgandi.

Biz uchun muhim o‘yin edi. Chunki turnir jadvalining yuqori qismida zichlik yuzaga kelgan. Biz ko‘proq hisobga qarab o‘ynadik. “Mash’al” o‘z uyida kuchli o‘ynaydi. Keyingi uchrashuvida omad tilayman.

Bizda ketma-ket uchrashuvlar - 3 sentyabr kuni AGMK bilan, 7-kuni “Mash’al”ga qarshi maydonga tushdik. Endi 10 sentyabrda “Buxoro” bilan ham qiyin o‘yin kutib turibdi. Bu uchrashuvga ham tiklanib yaxshiroq o‘ynashimiz kerak. O‘yinlarning orasi qisqa bo‘lganligi uchun biroz qiyin bo‘lyapti. Ammo Xudo xohlasa, umid qilamizki, hammasi yaxshi  bo‘ladi”, — dedi Xo‘jayev “Andijon” matbuot xizmatiga bergan intervyusida.