Mavsumni 5 uchrashuvdan iborat g‘alabali seriya boshlagan «Arsenal»ning turnir jadvalini haqli ravishda boshqarib borayotgani «to‘pchilar»ning so‘nggi transfer darchasida samarali ishlaganliklarini tasdiqlaydi.
Jamoa tarkibini aynan Mikel Arteta uchun kerakli futbolchilar to‘ldirishdi. Dastlabki turlarda jamoaning barqaror o‘yin ko‘rsatishi bir oz shubhali ko‘ringan bo‘lsada, «Fulxem»ga qarshi bellashuv xavotirni bartaraf etdi. Jamoaning umumiy muvaffaqiyatida ayniqsa, norvegiyalik yarim himoyachi Martin Edegorning hissasi katta bo‘ldi. Har holda, u sardorlik bog‘ichi bejizga berilmaganligini isbotladi.
Sardor uchun yosh to‘siQ emas
«To‘pchilar» yetakchilik roliga kattaroq yoshdagi futbolchini tanlashlari kerak edi, degan fikr o‘rinli emas. Chunki «Arsenal» - APLning joriy mavsumdagi eng navqiron jamoasi. 23 yoshli norvegiyalik xavbekning aynan bosh murabbiyga maqbul uslubda to‘p surayotgani ham muhim ahamiyat kasb etadi. Buni shaxsan Artetaning o‘zi e’tirof etdi:
«Martin 18 oydan beri biz bilan birga. Nazarimda, u klubimiz qadriyatlariga mos keladigan o‘yinchi. Uni barcha jamoadoshlari hurmat qiladilar, klub xodimlari hayratdalar. Martin yetarli tajribaga ega, 23 yoshda bo‘lishiga qaramasdan, terma jamoaning sardori. O‘yinga bo‘lgan kuchli ishtiyoqini har kuni namoyish etadi, mas’uliyatli bo‘lishni yoqtiradi. Albatta, uni qo‘llab-quvvatlash lozim, bunga shubha yo‘q. Bu ayniqsa, Martinning o‘zi uchun muhim».
Edegor - rivojlanish bobida yoshidan o‘zib ketgan o‘yinchi. Bu borada Madriddagi sinov unga juda qo‘l keldi. Madridliklar norvegiyalik iqtidorni yaqin kelajakda qimmatbaho iqtidorga aylanishiga umid qilgan holda xarid qilishgandi. Biroq bunday katta bosimni yengish hammaga nasib etavermaydi. Shu sababli Edegor asosiy vaqtini o‘rinbosarlar jamoasida o‘tkazdi, keyin ijaralarga yo‘l oldi.
Avvalgi saviyasini tiklab olishida futbolchiga «Vitess» va Leonid Sluskiy yaqindan yordam berishgan bo‘lsada, «Real» darajasidan ancha yiroq edi. Bunday vaziyatda «Arsenal»ga o‘tish eng yaxshi qaror bo‘ldi. Oradan 1,5 yil o‘tgach, Martin yetakchilar safidan joy oldi. Ispaniyada toblangan yarim himoyachi «to‘pchilar» tarkibida ulkan ish hajmini bajarish bilan o‘ziga bildirilgan ishonchni oqlamoqda.
Maydonning ikkala yarmida ham foydali
To‘pni oldingi chiziqqa yetkazish masalasida Edegor bugungi «Arsenal»ning o‘ta muhim o‘yinchisidir. Arteta norvegiyalik shogirdiga yuksak ishonch bildirib, erkin harakatlanish huquqini berdi. Natijada yarim himoyachi bor kuch-mahoratini namoyish etmoqda.
Martinning kuchli jihati - maydondagi harakatlanishida. U «4x2x3x1» sxemasida nominal «o‘nlik» hisoblansada, o‘yinni maydonning turli hududlarida o‘tkazadi.
Birinchidan, to‘pni qabul qilishda qo‘shimcha variantlarga zarurat yuzaga kelganida, u tayanch hududiga qaytadi. «Fulxem» bilan kechgan bahsda «Arsenal» Marko Silvaning o‘ta samarali pressingiga duch kelgandi. «To‘pchilar» sxemani 3 nafar markaziy o‘yinchiga o‘zgartirgan bo‘lsalarda, raqib deyarli barcha hududlarni yopishga ulgurayotgandi. Jaka chap qanotda bosimni oshirish maqsadida oldinga o‘tgach, El-Nenni yolg‘iz qolgandi. Bu vaziyatda Edegorning misrlikka yaqinlashishi pressingdan tezroq chiqib ketishni ta’minladi.
Ikkinchidan, hujumdagi yordami. Bu borada ham Martinning to‘psiz harakatlari o‘z samarasini berdi. U kerakli pallada qanotlarga o‘tar yoki markazda qolardi. U sinchkovlik bilan to‘pni egallagan jamoadoshini kuzatar va shunga qarab pozisiyasini o‘zgartirardi. Ko‘pincha Edegor o‘z ta’qibchisini markazdan olib ketardi yoki bo‘sh hududga o‘tish orqali jamoadoshlariga tezkor reyd uyushtirish imkonini yaratardi.
Martinning roli shu bilan yakunlanib qolmaydi. Pressingda ham u doimo faol harakatlanadi. «Lester»ga qarshi bellashuvda norvegiyalik xavbek tayanch yarim himoyachisi Uilfrid Ndidini qo‘riqlagan, shu bois «tulkilar» qanotlardan hujumga o‘tishga majbur bo‘lishgandi. Londonliklar bunga tayyor edilar.
Jamoaning ustun jihatlari tezlik va qanotlarning ishonchli harakati ekanligini Edegor alohida ta’kidlaydi. Markaziy va qanot himoyachilarini hisobga olmaganda, to‘p aynan unga uzatiladi. Natijada norvegiyalik yarim himoyachi har bir uchrashuvda o‘rtacha 52ta uzatmani amalga oshiradi va o‘yinning eng faol ishtirokchilaridan biri bo‘ladi.
Hozirgi «Arsenal» - «soG‘aya boshlagan» klub nishonasi
Arsen Venger davrining so‘nggi yillari va undan keyingi dastlabki yillarda «Arsenal» ayanchli xolatga tushib qolgandi. Seleksionerlar bir qator saviyali o‘yinchilarni (Lyakazett, Obameyyang, Pepe, avvaliga - Genduzi) va murabbiylarni (Emeri) Londonga olib kelishgan bo‘lsada, amalda vaziyat o‘zgarmadi.
Hatto Mikel Arteta ham dastlabki mavsumlarida sezilarli siljishga erisha olmadi. endi avvalgi izlanishlar, ko‘rilgan chora-tadbirlar asta-sekin o‘z samarasini bera boshladi. Oldingi chiziq vakillari kasbdoshlari o‘rnini to‘ldirish bilan birgalikda, bir-birlarining ustun jihatlarini tasdiqlamoqdalar. Qanotlar tezkorlik bilan hududlarni yopib, to‘p yo‘lida ishonchli to‘siq bo‘lishmoqda. Lekin markaziy himoyachilar harakatlari mukammal emas. (to‘g‘ri, xatoliklar hammada bo‘lishi mumkin)
«Arsenal»ning ajoyib startini inkor etmagan holda, APL mavsumi doimo uzun va keskin bo‘lishini ham hisobga olish kerakligini eslatib o‘tamiz. Jamoaning barqaror ishtirokini ta’minlash uchun zaxira o‘rindig‘i uzun bo‘lishi talab etiladi. Mikel Arteta natijalarga baho berishda anchayin vazmin bo‘lishga chorlamoqda:
«Jamoa uchun har bir g‘alaba - ulkan kuch-quvvat manbai. Unga erishish o‘ta yoqimli. Biz xatoga yo‘l qo‘ydik va raqib bizni jazoladi. Biroq keyin muammoga qanday munosabatda bo‘lganimiz, muxlislar bilan aloqalarimiz, g‘alaba qozonishni istagan o‘yinchilarimizdagi ishonch o‘yin natijasiga o‘z ta’sirini ko‘rsatdi. Kelasi haftada bizni 2ta uchrashuv kutib turibdi. Ularga yaxshi tayyorgarlik ko‘rib, yaxshi sport formasini tiklab olishimiz lozim. APLdagi har bir o‘yin - jiddiy sinov. Bu faqat mavsumning boshlanishi. Biz o‘ta uzun va murakkab marafonda ishtirok etayotganimizni unutmasligimiz kerak»
«Liverpul», «Man.Siti», «Chelsi» kabi gigantlari bor chempionatda g‘oliblik haqida gapirishdan foyda yo‘q, albatta. Lekin Martin Edegorning faolligi evaziga inqirozdan forig‘ bo‘layotgan «Arsenal»ning startdagi g‘alabalar seriyasi maqtovga loyiq.
S.RAHMONOV tayyorladi
