Viloyat hokimi Xayrullo Bozorov ta’mirlash ishlari yakunlangan Farg‘ona shahridagi “Istiqlol” o‘yingohida bo‘ldi. Xalqaro talablarga mos sport arenasiga aylanayotgan o‘yingohda yakuniy sinov jarayonlari amalga oshirilmoqda.

2022 yilning yanvar oyidan buyon amalga oshirilayotgan ta’mirlash ishlari doirasida asosiy futbol maydoni ostida joylashgan drenaj tizimi to‘liq yangilanib, futbol maydonini sug‘orish uchun Yevropa standartlariga mos keladigan avtomatlashtirilgan qurilmalar o‘rnatildi. Maydonda xorijdan 4 faslga moslashgan 2 xil turdagi “Turfline YE” hamda “Genta” maysa urug‘lari olib kelib ekilib, ayni kunda yam-yashil unib chiqqan chimlarni ko‘rish mumkin. Ularni parvarishlash uchun xorijdan yangi zamonaviy maxsus texnika vositalari olib kelingan.

Futbol maydoni atrofida joylashgan yugurish yo‘lakchalari ham qayta ta’mirlandi. Umumiy binolarni ham ta’mirlash ishlari amalga oshirildi. Shuningdek, futbol maydonini yoritish tizimi Osiyo Futbol Konfederasiyasi talablariga mos keladigan 1800 lyuks quvvatga ega bo‘ldi.

20 ming tomoshabin sig‘imiga ega stadionda 18 oktyabr kuni 2022 yilgi Superliga ikkinchi davrasi markaziy o‘yinlardan biri – Farg‘onaning “Neftchi” hamda Namanganning “Navbahor” jamoalari o‘rtasidagi uchrashuv o‘tkazilishi rejalashtirilgan.

Viloyat hokimi mas’ullar bilan o‘yingohda yakuniy ta’mirlash-sinov jarayonlarining borishini muhokama qildi. Maydon atrofiga reklama tablolarini o‘rnatish, tomoshabinlar o‘rindiqlari joylashuvi qiyofasini yanada jozibador qilish uchun mablag‘ ajratilishi ma’lum qilindi, muxlislar uchun kerakli barcha qulayliklarni yaratish bo‘yicha ko‘rsatma va topshiriqlar berildi.