"Barselona" himoyachisi Ronald Arauxo Urugvay terma jamoasida jiddiy jarohat oldi.

Kecha Kataloniya klubi 23 yoshli himoyachining o‘ng sonida avulsion sinishi borligi haqida xabar berdi. Bu mushak paylari biriktirilgan joyda suyak zarralarining ajralishini anglatadi.

U bu jarohatni Urugvayning Eronga qarshi o‘rtoqlik uchrashuvida (0:1) olgan. Futbolchi 4-daqiqada almashtirildi.

Diario Sport nashrining xabariga ko‘ra, bunday tashxis bilan futbolchi jarrohlik amaliyotiga muhtoj bo‘lishi mumkin. Bunday holda, Arauxo jahon chempionatini o‘tkazib yuborish xavfini tug‘diradi.

Biroq, futbolchiga yaqin manbaning xabar berishicha, Ronald operasiyadan voz kechishga qaror qilgan. Endi futbolchi tuzalib, Jahon chempionati startiga qadar formaga kirishiga ishonch bildirmoqda.

Ta’kidlanishicha, jarohatning jiddiyligi birozdan keyin ma’lum bo‘ladi, chunki Arauxo hali barcha kerakli tekshiruvlardan o‘tmagan. Ularning natijalari qanday bo‘lishidan qat’iy nazar, urugvaylik futbolchi har qanday holatda ham operasiyadan bosh tortishga qaror qildi.

Arauxo "Barselona" uchun juda muhim pallada bunday jarohat olgani uchun juda xafa bo‘ldi, lekin hozir u faqat tiklanishni boshlashga va imkon qadar tezroq maydonga qaytishni o‘ylamoqda.