"Барселона" ҳимоячиси Роналд Араухо Уругвай терма жамоасида жиддий жароҳат олди.

Кеча Каталония клуби 23 ёшли ҳимоячининг ўнг сонида авулцион синиши борлиги ҳақида хабар берди. Бу мушак пайлари бириктирилган жойда суяк зарраларининг ажралишини англатади.

У бу жароҳатни Уругвайнинг Эронга қарши ўртоқлик учрашувида (0:1) олган. Футболчи 4-дақиқада алмаштирилди.

Diario Sport нашрининг хабарига кўра, бундай ташхис билан футболчи жарроҳлик амалиётига муҳтож бўлиши мумкин. Бундай ҳолда, Араухо жаҳон чемпионатини ўтказиб юбориш хавфини туғдиради.

Бироқ, футболчига яқин манбанинг хабар беришича, Роналд операциядан воз кечишга қарор қилган. Энди футболчи тузалиб, Жаҳон чемпионати стартига қадар формага киришига ишонч билдирмоқда.

Таъкидланишича, жароҳатнинг жиддийлиги бироздан кейин маълум бўлади, чунки Араухо ҳали барча керакли текширувлардан ўтмаган. Уларнинг натижалари қандай бўлишидан қатъий назар, уругвайлик футболчи ҳар қандай ҳолатда ҳам операциядан бош тортишга қарор қилди.

Араухо "Барселона" учун жуда муҳим паллада бундай жароҳат олгани учун жуда хафа бўлди, лекин ҳозир у фақат тикланишни бошлашга ва имкон қадар тезроқ майдонга қайтишни ўйламоқда.