Qatarda bo‘lib o‘tadigan Jahon chempionati tashkiliy qo‘mitasi Hummel kiyim-kechak brendining Daniya terma jamoasi libosim borasida yo‘llagan e’tiroziga munosabat bildirdi.

Eslatib o‘tamiz, Hummel kompaniyasi o‘z logotipi va mashhur chevronlarni futbolka bilan deyarli bir xil rangda yasagan. Bunga minglab odamlar halok bo‘lgan turnirda kompaniyani reklama qilmaslik istagi sabab bo‘lgan.

"2022 yilgi Jahon chempionatiga mezbonlik qilish huquqini qo‘lga kiritgach, tashkiliy qo‘mita turnir uchun abadiy meros ustida ishlamoqda. Shu sababli, biz Hummel kompaniyasining ushbu turnir minglab odamlarning hayotiga zomin bo‘lgan degan da’vosiga qarshi chiqamiz. Biz stadionlar qurilishida ishtirok etgan 30 000 ishchi xavfsizligini ta’minlashdagi xizmatlarimizni kamsitishni rad etamiz”, — deyiladi tashkiliy qo‘mita rasmiy bayonotida.

Qatardagi Jahon chempionati ikki oydan kamroq vaqt ichida boshlanadi. Ochilish uchrashuvida mezbonlar 20 noyabr kuni Ekvador bilan kuch sinashadi. “D” guruhida Daniya Fransiya, Avstraliya va Tunis terma jamoalari bilan kuch sinashadi.