Futzal bo‘yicha O‘zbekiston terma jamoasi darvozaboni Ravshan Eliboyev OFK rasmiy saytiga intervyu berdi.

"Tojikiston juda yaxshi o‘ynadi. Boisi, ular bizni yaxshi o‘rganishgandi. Yozda bu jamoaga qarshi 3ta o‘rtoqlik uchrashuvi o‘tkazgandik. Shuning uchun ular bizni yaxshi bilishardi.

Pley-off bosqichiga chiqqanimizdan xursandmiz. Bu bizning birinchi maqsadimiz edi. Shuningdek, bizni qo‘llab-quvvatlab turgan muxlislarga minnatdorchilik bildirmoqchiman", — dedi darvozabonimiz.

O‘zbekiston 1 oktyabr kuni guruh bosqichining 3-turi doirasida Bahraynga qarshi maydonga chiqadi. Eliboyev mazkur o‘yinda ham terma jamoamiz g‘alaba qozonishni niyat qilayotganini aytib o‘tdi.

"Jamoamizda barchasi joyida. O‘zimizni yaxshi his etyapmiz. Dastlabki 2ta o‘yinda maksimal ochko jamg‘ardik va o‘z ishimizni davom ettirishni istaymiz.

Bahraynning Turkmanistonga qarshi o‘yinini tomosha qildik. Ularning futzalchilari jismoniy jihatdan baquvvat. Bahraynga qarshi qanday taktikada o‘ynashimizni murabbiy hal qiladi. Biz esa unga amal qilishimiz kerak", — dedi Eliboyev.