O‘zbekiston futzal milliy terma jamoasi darvozaboni Ravshan Eliboyev Kuvaytda davom etayotgan Osiyo kubogi bahslari va Bahraynga qarshi uchrashuv haqida o‘z fikrlarini bildirib o‘tdi.

— Musobaqa tashkilotchiligi haqida
— Turnir yaxshi tashkil etilgan. Bizni yaxshi kutib olishdi, sharoitlar tashkil etib berishdi.

— O‘tkazilgan ikki o‘yin haqida
— Raqiblarimizni yaxshi o‘rganib chiqdik. Xususan, Turkmaniston bilan kechgan o‘yinda ko‘plab imkoniyatlarga ega bo‘ldik va ulardan foydalana oldik. Tojikistonga qarshi o‘yinga keladigan bo‘lsak, uchrashuvni yaxshi boshladik. Biroq keyingi taymda Tojikiston ham o‘yinni o‘z tarafiga og‘dirishga harakat qila boshladi. Ular bilan juda ko‘p to‘qnash keldik. Shu sababli ular bizni yaxshi o‘rgangan va bu narsalar o‘yinda qo‘l keldi. Asosiysi, uch ochkoni qo‘lga kiritdik va keyingi bosqichga chiqdik deb o‘ylayman.

— Jamoani ruhlantirish va Tojikiston bilan o‘yindagi seyvlar haqida
— Har bitta o‘yindan oldin hamma konsentrasiyasini jamlab, o‘zini ruhan tayyorlab chiqadi. Aslida hamma narsa tajribani ortidan keladi. Biz bu jamoa bilan Jahon chempionatida o‘ynadik, shu sababli baribir tajriba o‘z so‘zini aytdi. Har qanday bosim va qiyin vaziyatda bu narsa sizga qo‘l keladi.

— O‘tkazib yuborilgan gollar haqida
— Imkon qadar darvoza daxlsizligini saqlashga harakat qildim. Lekin har ikkala golda ham imkon qadar urindim, lekin raqib ham o‘ziga yarasha potensiali yuqori futzalchi edi, shu sababli ular ham imkoniyatdan foydalana olishdi.

— Bahrayn bilan bo‘ladigan o‘yin haqida
— Bundan ham chiroyli o‘yinlar ko‘rsatishga imkonimiz bor, sheriklarimga ishonaman. Bahraynga keladigan bo‘lsak, raqibni o‘rganmoqdamiz. O‘tgan o‘yinlardagi xatolarni ko‘rib chiqib, bu bahsda ularni takrorlamaslikka harakat qilamiz. O‘ylaymanki, Bahrayn bilan chiroyli o‘yin ko‘rsatamiz.