Angliya milliy jamoasi pleymeykeri Meyson Maunt o‘z klubi - «Chelsi» rasmiy saytiga bergan eksklyuziv intervyusida asosan Qatar mundialiga bog‘liq umidlari bilan o‘rtoqlashdi.
U shu asnoda bolalik davri o‘zi tomosha qilgan turnirlar va ularda kuzatilgan mashhur gollarni esladi, afsonaviy futbolchilar ta’siri haqida ham gapirdi. Hozirga qadar Angliyaning U-16 termasidan milliy jamoasigacha bo‘lgan yo‘lni bir nafasda bosib o‘tgan Meyson bo‘lajak jahon forumida ham o‘z salohiyatini to‘liq ko‘rsatmoqchi. 23 yoshli futbolchi shu maqsadda kattalar miqyosidagi debyut mundialiga jiddiy shaylanmoqda.
- O‘zingiz kuzatgan ilk jahon chempionatini qanday eslaysiz?
- 2002 yilgi JCHdan ayrim lahzalar xotiramga muhrlangan. Deylik, chorak final o‘yinida Ronaldinyoning Angliya terma jamoasi darvozasiga urgan golini eslayman. Umuman, o‘sha mundialda kuzatilgan chiroyli va muhim gollarni bilaman, lekin hammasi qanday kechganini emas. Chunki 2002 yili atigi 3 yoshda bo‘lganman. Germaniya mezbonlik qilgan keyingi JCHni esa to‘liq kuzatganman, uning voqealari ham esimda. Ayniqsa, turnirni «portlatgan» Ueyn Runi o‘yinlari katta taassurot qoldirgandi. Ulg‘aygan sari jahon turnirlarini oilam davrasida Angliya terma jamoasi futbolkasida birgalikda tomosha qila boshlaganman. Aytishim mumkinki, har bir katta o‘yin arafasida kuchli hayajonga tushardim, bor diqqatimni maydondagi voqealarga qaratardim. Umuman, jahon chempionati barchani, hattoki, butun xalqni birlashtirish quvvatiga ega. Qisqasi, mundiallarga bog‘liq xotiralarim juda ko‘p va ajoyib.
- Qiziq, o‘yinlarni oddiy muxlis sifatida ko‘rarmidingiz yoki kuzatish asnosida qandaydir qo‘llanmalar olish maqsadida?
- Avvalo, muxlis maqomida, albatta. Shuning barobarida Angliya termasi va boshqa jamoalar safida to‘p surgan afsonaviy futbolchilar harakatini obdon kuzatishga ham qiziqqanman. Endi esa o‘zim futbol ichidaman va taassurotlar biroz boshqacha. Xususan, Rossiyada o‘tkazilgan oxirgi jahon chempionati o‘yinlarini bevosita stadionlarda ko‘rdim. Rossiya safari davomida Angliya termasi joylashgan mehmonxonada ham bo‘ldim va mamlakat nomidan JCHdek turnirda maydonga tushish qandayligini ma’lum darajada his qildim. Shu ma’noda JCH-2018ga kuzatuvchi sifatida borish men uchun beqiyos maktab bo‘ldi. Oddiy aytganda, barchasini yaqindan ko‘rish va anglash juda katta ahamiyat kasb etdi, umuman, o‘sha sayohatdan ko‘p narsa olib qaytdim.
- Mundiallar uchun atalgan qo‘shiqlardan qay birini bilasiz, ulardan eng yaxshisini ayta olasizmi?
- Shakiraning 2010 yilgi jahon chempionati uchun yaratgan qo‘shig‘i (Waka, Waka, This Time for Africa)ni har doim eslayman - kuy va so‘zlarning haqiqiy uyg‘unlashuvi! Vindaloo qo‘shig‘i ham yaxshi chiqqan, bunisi shunchaki, mo‘’jiza.
- Esingizda qolgan jahon chempionatiga taalluqli eng yorqin lahza...
- Frenk Lempardning Germaniya terma jamoasi darvozasiga urgan goli. Afsuski, shunday chiroyli va toza gol hisobga olinmadi. O‘sha o‘yinni jonli ravishda ko‘rganman va lahzalarini eslasam, hanuzgacha siqilaman. Chunki Lempard zarbasidan keyin to‘p darvoza ichiga kirganini hamma ko‘rgandi, faqat hakamlar emas. Oxir-oqibat, mo‘’jizakor gol uvol ketdi. Shuningdek, miyamga o‘rnashgan yorqin lahzalardan yana biri - bu Xames Rodrigesning goli. Umuman, uning ijrosida Braziliya-2014 turniridan esga olishga arziydigan harakatlar juda ko‘p - gavdaning ko‘krak qismi bilan gol, «voleybol», shuningdek, sehrli driblinglar... Qisqasi, Xamesning 2014 yilgi ishtiroki aqlga sig‘mas darajada zo‘r chiqqandi.
- Mundiallarda o‘zingiz ko‘rgan eng kuchli futbolchi kim?
- Yoshligidayoq jamoada katta rolni qo‘liga olgan Runi va albatta, Beks (Devid Bekxem). Shu ikkisi meni har doim o‘zgacha ilhomlantirgan. Esimda, bolaligimda jarima zarbasini Bekxem usulida tepishga urinardim. Biroz ulg‘ayganimda yosh Runi katta sahnaga ko‘tarildi va uning qanday yulduz bo‘lganiyu, hamisha diqqat markazida turganini alohida kuzatdim. O‘sha vaqt Ueynning o‘yinlari, umuman, faoliyati shunchaki, aqlga sig‘masdi. Axir u Angliya futbolidagi rekordlarni birin-ketin yangilashga tushib, eng zo‘ri ekanligini isbotladi. Xullas, mundiallarda eng kuchli taassurot uyg‘ongan futbolchilardan biri - Runi.
- JCHda foydalanilgan eng sevimli futbolka...
- Menga hamisha Angliya termasining qizil rangli libosi yoqqan. Jamoa asosan safar o‘yinlarida o‘sha formada harakatlanardi. O‘zimda esa Bekxemga tegishli 7-raqamli forma bor edi.
- JCH uchun ishlab chiqarilgan eng chiroyli to‘p...
- «Jabulani»-2010ni yaxshi eslayman. Futbolchilar u bilan chiroyli gollar urishgan. Adashmasam, ochilish o‘yinidayoq kimdir uzoq masofadan chap oyoqda benazir gol urgan va sharhlovchi ham bunga qoyilmaqom munosabat bildirgandi: «Bu gol butun Afrika uchun!»
- Imkon berilsa, jahon chempionati finalida qaysi stadionda maydonga tushishni xohlardingiz?
- Ma’lum sabablarga ko‘ra, Portudagi «Dragau» arenasini tanlayman. Undagi muhitni ta’riflashga til ojiz.
- Qatar-2022 startini intiq holda kutayotganingiz aniq. Bo‘lajak JCHga bog‘liq umidlaringiz qanday?
- Bolalik yillari jahon chempionatida qatnashishni orzu qilib, vaqti kelib turnirga yo‘llanma olish va milliy jamoa tarkibiga tushish - bu aql bovar qilmas o‘zgacha tuyg‘u. Guruhimizdagi raqiblarni yaxshi bilamiz, so‘nggi bir necha yil davomidagi o‘yinimiz bilan nimalargadir da’vogarlik qilishimizga ishonchimiz komil. O‘tgan turnirga nisbatan olganda, yana bir qadam oldinga yurish uchun bor kuchimizni ishga solamiz, albatta.
- Sizningcha, Qatarda qaysi jamoalarga ko‘proq e’tibor qaratish kerak?
- Har doimgidek, Yevropa vakillari - Ispaniya va Germaniya termalariga. Yana Braziliya va Argentina kabi azaliy kuchli jamoalar borki, hech qachon ularga qarshi o‘ynamaganman. Bunday o‘yinlarda ishtirok etish - orzu. Afsuski, Angliya termasi xalqaro futbolda braziliyaliklar va argentinaliklar bilan kamdan-kam holda to‘qnash keladi. JCH esa shunday imkoniyat taqdim etishi mumkin. Har ikki jamoaning tarixga aylangan turnirlarda ko‘rsatgan karomatlari - alohida hikoya. Shunday ekan, Braziliya va Argentina termalariga qarshi o‘yinlar har qanday futbolchini o‘zgacha to‘lqinlantirishi mumkin. Bular - siz duch kelishni istaydigan raqiblar.
MUHAMMADXON tayyorladi
