“Manchester Yunayted” hujumchisi Krishtianu Ronaldu 17 oktyabr, dushanba kuni "Shatle" teatrida (Parij) bo‘lib o‘tadigan “Oltin to‘p”ni topshirish marosimida ishtirok etishi mumkin, deb xabar beradi Le Parisien nashri.
Mashhur hujumchi oxirgi marta ushbu tadbirga besh yil avval tashrif buyurgandi va o‘shanda ushbu sovrinni qo‘lga kiritgandi.
37 yoshli portugaliyalik futbolchi 5 marta “Oltin to‘p”ni qo‘lga kiritgan. Krishtianuning asosiy raqibi Lionel Messi bu sovrinni yetti marta olgan.
Madridning “Real” klubi hujumchisi Karim Benzema 2022 yilda ushbu sovringa asosiy da’vogar sifatida ko‘rilmoqda. O‘tgan mavsumda hujumchi "Real" bilan Chempionlar ligasida g‘olib chiqdi, shuningdek, Primyera, Ispaniya Superkubogi va UYEFA Superkubogini qo‘lga kiritdi.
