Bahraynda og‘ir atletika bo‘yicha navbatdagi qit’a birinchiligi o‘z poyoniga yetdi. Quvonarlisi, unda ishtirok etgan O‘zbekiston terma jamoasi jami 6 ta oltin, 3 ta kumush va 10 ta bronza medallarini qo‘lga kiritdi. Olimpiada chempionlarisiz musobaqada qatnashgan erkaklar terma jamoamiz esa birinchi bo‘ldi.

Yigitlarimiz musobaqada 6 ta oltin, 2 ta kumush va 5 ta bronza medallarini jamg‘arishdi. Qayd etish joiz, musobaqada jahon chempionatiga alohida tayyorlanayotgan ikki asosiy vakillarimiz Ruslan Nurudinov va Akbar Jo‘rayev ishtirok etgani yo‘q. Qizlarimiz esa murosasiz bahslar davomida 1 ta kumush va 5 ta bronza medallarini jamoamiz g‘aznasiga qo‘shib qo‘yishdi.

O‘zbekiston terma jamoasining Osiyo chempionatida qo‘lga kiritgan muvaffaqiyati bilan mamlakat og‘ir atletika federatsiyasi, sportchi va murabbiylar, federatsiyaning barcha mutasaddilarini samimiy qutlaymiz.