"Arsenal" himoyachisi Kiran Tirni jamoadoshi Gabriel Jezus haqida fikr bildirdi.
Eslatib o‘tamiz, 25 yoshli hujumchi o‘tgan yozda "Manchester Siti"dan 52 million yevro evaziga "Arsenal"ga ko‘chib o‘tgan edi. Braziliyalik futbolchi joriy mavsum “kanonirlar” safida 14 ta o‘yinda maydonga tushib, 5 ta gol urdi va shuncha golli uzatmani amalga oshirdi.
Tirni Jezusni u bilan birga o‘ynagan eng yaxshi o‘yinchilardan biri deb atadi. Shotlandiyalik futbolchining ta’kidlashicha, braziliyalik hujumchi yosh bo‘lishiga qaramay, katta tajribaga ega.
“U ajoyib. Rostini aytsam, men maydonda va mashg‘ulotlarda birga o‘ynagan futbolchilar orasida u eng yaxshilaridan biri. Unda g‘alabaga tashnalik bor. U hamma narsada g‘alaba qozonishni xohlaydi. Nima o‘ynashingizning ahamiyati yo‘q, mashg‘ulotda bosh tennisi bo‘lsa ham u har bir ochko uchun kurashadi va nimadir yutib olishni xohlaydi. Uning mentaliteti shunday", - dedi Tirni The Telegraph bilan suhbatda.
"Arsenal" navbatdagi o‘yinni 30 oktyabr kuni "Nottingem Forest"ga qarshi o‘tkazadi.
