Belgiya terma jamoasi yarim himoyachisi Eden Azar Qatardagi jahon chempionatida g‘olib chiqish niyatida ekanligini aytdi.
“Biz mavsadni yuqori o‘rnatishimiz kerak. 2018 yilgidan yaxshiroq o‘yin ko‘rsatishimizni istayman. Bu qiyin bo‘ladi, chunki bu natija allaqachon juda yaxshi edi. Men buyuk jamoa sardori bo‘lish va buyuk futbol mamlakati vakili bo‘lish baxtiga muyassarman, shuning uchun biz turnirga katta umidlar bilan borishimiz kerak.
Hamma “oltin avlodimiz” haqida tinmay gapiradi va bunda qandaydir haqiqat bor. Biz deyarli o‘n yildan beri birgamiz. Hozir terma jamoada yosh futbolchilar paydo bo‘la boshladi. Albatta, bizda aql bovar qilmaydigan futbolchilar avlodi bor, ammo biz haligacha hech narsa yutganimiz yo‘q. Agar biz haqiqatan ham “oltin avlod” deb nomlanishni istasak, menimcha, jahon chempionatida g‘alaba qozonishimiz kerak”, — dedi Azar.
31 yoshli yarim himoyachi 2008 yilda Belgiya terma jamoasi safida debyut qilgan va ular tarkibida 122 o‘yinda maydonga tushib, 33 gol urgan va 36 golga assistentlik qilgan.
