Superliga 23-turidan o‘rin olgan «Navbahor» – «Olimpik» (1:1) o‘yinidan so‘ng mezbonlar ustozi Samvel Babayan birinchi bo‘limda uning jamoasi to‘liq ustunlikka erishgani, g‘alabaga nima halaqit qilayotgani va asosiy futbolchilarning holati haqida fikr bildirdi.

«Navbahor» ishtirokidagi o‘yinlar hech kimni befarq qoldirmayapti, deyish mumkin. Afsuski, oxirgi o‘yinlarda ko‘p asabiylashayapmiz va bu g‘alaba qozonishimizga halaqit qilayapti.

Birinchi taymda to‘liq ustunlik qildik, taymni 3:0 hisobidagi g‘alaba bilan yakunlab chiqib ketishimiz kerak edi. Afsuski, yana o‘sha vaziyatlardan foydalana olmaslik kasalligi halaqit qilayapti. Futbolchilar yaxshi o‘ynashayapti va ko‘plab vaziyatlar yaratishayapti. Faqat yakunlashda oqsayapmiz. Tarkibning asosini tashkil etuvchi futbolchilarning darajasi hozirda yaxshi.

Oldimizda yana to‘rtta o‘yin bor. Kubok finali va chempionatning uchta o‘yini. Ularda muxlislarni xursand qilishga harakat qilamiz. Yaxshi o‘yin boshqa, ammo muxlislarga sovrin olib berishimiz uchun natija ham kerak», — dedi mezbonlar bosh murabbiyi.