"Roma" bosh murabbiyi Joze Mourinyo Jorjinyo Veynaldumning jarohati fonida maydon markazini kuchaytirishga qaror qildi.
Calciomercato nashri xabariga ko‘ra, rimliklar e’tiborini "Lion" yarim himoyachisi Ussem Auarga qaratgan.
Yarim himoyachiga “bo‘rilar”dan tashqari Ispaniyaning “Betis” jamoasi ham da’vogarlik qilmoqda. Klub o‘tgan yozda fransiyalik futbolchini qo‘lga kiritishni rejalashtirgandi, ammo moliyaviy muammolar tufayli buni amalga oshira olmagandi. "Betis" futbolchini shartnoma muddati tugaganidan keyin, aniqrog‘i 2023 yilning yozida tekinga qo‘lga kiritishni kutgandi. Biroq, “Lion” rahbariyati endi yanvar oyidagi transfer oynasida o‘z futbolchisini nominal to‘lov evaziga sotishga qaror qildi. Bu tartib "Roma"ga mos keladi, lekin "Betis"ga emas.
Auarning moliyaviy so‘rovlari ham transferni amalga oshirish uchun muammoga aylanishi mumkin. Ma’lum qilinishicha, futbolchi va uning agentlari har bir mavsum uchun kamida 4,5 million yevro + ehtimoliy bonuslar talab qiladi. Agar "Roma" fransiyalik futbolchini transfer qilishdan bosh tortsa, "Betis" rahbariyati bunday so‘rovlarni qondira olmaydi, chunki ular ilgari maosh chegarasi tufayli La Liga bilan bog‘liq muammolarga duch kelishgan.
