Superliganing 24-turidan o‘rin olgan «Nasaf» — «Dinamo» (1:0) uchrashuvidan so‘ng mezbonlar bosh murabbiyi Ro‘ziqul Berdiyev matbuot anjumanida ishtirok etdi.

— Qiyin o‘yin bo‘lishini bilardik. Bunday o‘yinlarga jamoani tayyorlash oson bo‘lmaydi. Sababi yaqinda kubokni yutdik, shuning ruhiyati yigitlarda sezilmasdan qolmaydi. Bundan tashqari raqib ham so‘ngi o‘rindagi jamoa edi. Aytib o‘tganimdek, oson o‘yin bo‘lmadi. Bugun bizning maqsadimiz uch ochko edi va qiyin o‘yinda buni uddaladik. Jamoamiz a’zolarini va muxlislarini g‘alaba bilan tabriklayman.

— Oldinda «Neftchi» qarshi mas’uliyatli o‘yin kutib turibdi...
— Ha, hozirgi kunda hech bir o‘yin oson o‘tmayapti. Raqiblar bizning maydonda chuqur himoyaviy o‘yin tashkil etayapti. Bu bizga yetarlicha qiyinchilik tug‘diradi. Qiynalmaslik uchun vaziyatlarni golga aylantirish zarur. Penaltilar asosiy muammomiz bo‘lib qolayapti. Bizda penaltilarni Norchayev tepardi. Bugun 11 metrlikdan Solovyov tepishi haqida ko‘rsatma bergandim. Ammo u ham maydonda yo‘q bo‘lgani sabab Lima Kruz mas’uliyatni bo‘yniga oldi. Biroq, u ham imkoniyatdan foydalana olmadi.

— Husayn Norchayev va Dilshod Saitovlarning jarohatlari jiddiymi?
— Norchayev mashg‘ulotlarga qo‘shildi. Keyingi o‘yinlarga tayyor bo‘lishi kerak. Dilshod Saitov finalda bir oz jarohat olgandi. O‘zi umuman bugun ko‘p futbolchilarni rotasiya qildik. Markoning jarohati bo‘yicha shifokorlar bilan gaplashamiz.

— So‘nggi turda «Olimpik» bilan o‘ynaysizlar. Rotasiyalar ushbu ko‘p yuguradigan jamoa bilan o‘yinga futbolchilarning jismoniy imkoniyatlarini saqlab qolish uchun amalga oshirilayaptimi?
— «Olimpik»ning barcha futbolchilari ko‘p yuguradi. Ular bilan o‘yinda ham ijobiy natija uchun maydonga chiqamiz. Navbatdagi turda «Neftchi» ham osonlikcha taslim bo‘lmaydi.