Superliga 24-turidan o‘rin olgan “Nasaf” – “Dinamo” (1:0) o‘yinidan so‘ng mezbon jamoa bosh murabbiyi Ro‘ziqul Berdiyev jamoasiga qarshi o‘yinlarda raqiblar chuqur himoyada o‘ynayotgani, penaltilar muammosi va jarohat olgan futbolchilar borasida fikr bildirdi.

“Qiyin uchrashuvda qiyin g‘alabaga erishdik. Bunday o‘yinlarga jamoani ruhan tayyorlash biroz qiyin kechadi. Kubokni yutgandan keyin, futbolchilarda buning ruhiyati seziladi. Qolaversa, raqiblar bizga qarshi o‘yinlarda chuqur himoyaviy o‘yin namoyish etishmoqda. Maqsadimiz uch ochko edi va qiyin o‘yinda buni uddasidan chiqdik”

“Penaltidan gol ura olmaslik asosiy muammoimizga aylanib bormoqda. Shtatli penaltichimiz Norchayev o‘ynamayapti. Bugun penaltini Solovev tepishi lozim edi. U ham penalti bo‘lgan vaziyatda maydonda emasligi bois, Lima mas’uliyatni o‘z zimmasiga olgan edi, ammo u ham bugun bundan foydalana olmadi”.

“Husayn Norchayev mashg‘ulotlarimizga qo‘shildi. Keyingi o‘yinga tayyor bo‘lsa kerak. Dilshod Saitov kubok finalida biroz jarohat olgandi. Umuman, ko‘pchilikni rotasiya qildik. Stanoyevichning jarohati bo‘yicha shifokorlar bilan gaplashaman”.

“Olimpik”ning barcha futbolchilari ko‘p yuguradi. Ular bilan o‘yinda ham ijobiy natija uchun maydonga tushamiz. “Neftchi” ham osonlikcha taslim bo‘lmaydi”.