Pro liga 25-turidan o‘rin olgan «Yangiyer» — «Sho‘rtan» uchrashuvidan so‘ng g‘uzorliklar bosh murabbiyi Asror Aliqulov matbuot anjumanida ishtirok etib, jurnalistlar savollariga javob berdi.

— Bellashuv boshida biz to‘p nazoratni o‘z qo‘limizga olgandek bo‘ldik. Uchrashuv boshida bu sezila boshladi. Hattoki birga-bir vaziyatga ham ega chiqqandik. Ammo o‘yin davomida tashabbusni maydon egalariga bera boshladik. Ular ham xavfli hujumlar uyushtira boshlashdi. Tanaffus vaqtida bu kamchiliklarni yigitlarga tushuntirdik. Bellashuvning so‘ngi soniyalarida o‘tkazib yuborilgan to‘pni hisobga olmaganda biz ikkinchi bo‘limni yaxshi o‘tkazdik va mezbonlarga deyarli hujumlar tashkil etishga imkon bermadik. Raqibning uzun paslariga tayyor edik. Biz qarshi hujumlarda imkoniyatlar yaratdik va birinchi bo‘lib gol urishga erishdik. Yaratilgan vaziyatlarni golga aylantirishimiz mumkin edi. Lekin vaziyatlardan unumli foydalanmadik va aksincha so‘ngi soniyalarda o‘tkazib yuborilgan gol bizni g‘alabadan mahrum etdi.

— 93-daqiqadagi ikkita o‘zgarishdan maqsad nima edi?
—  Futbolchilarni almashtirishdan maqsad raqibning oldingi chizig‘iga bosim o‘tkazish edi. Chunki bizning hujum chizig‘imizdagi futbolchilarda toliqish bor edi. Uchrashuvning oxirgi daqiqalarida raqibga ozroq vaqt berganimiz natijasida jarima maydonchamiz ichida pala-partishlik yuzaga keldi va darvozamizdan to‘p olib chiqishga majbur bo‘ldik. Tayyor g‘alabani qo‘ldan boy berdik.

— Adashmasam «Sho‘rtan» jamoasi 27 avgust kuni Andijonda mag‘lubiyatga uchragan edi va shundan buyon mag‘lubiyatsiz seriyani qayd etib kelmoqda. Pastdagi beshtalikda birinchi o‘rinda ketayotganidan kelib chiqib, «Sho‘rtan»da yangi nomlarni, yosh iqtidorli kashf qilish rejasi bormi?
— Biz tarkibimizda rotasiya ham qilib turibmiz. Bugungi bellashuvda ham ayrim futbolchilarimizga dam bergan edik. Yoshlar haqida gapiradigan bo‘lsak, bizni jamoamizni asosini o‘zi yoshlar tashkil etadi. Turnir jadvalidagi o‘rin haqida gapiradigan bo‘lsak, yuqoridagi beshlik jamoalari nisbatan kuchli jamoalar. Sakkiz o‘yindan buyon mag‘lubiyatga uchramasligimizga sabab biz bilan bir guruhdan o‘rin olgan jamoalarning saviyasiga va ko‘rsatayotgan o‘yiniga bog‘liq. Tepadagi beshlik qiyinroq edi. Bu birinchi sababi edi. Ikkinchidan bizga vaqt kerak edi. Uchinchi marta jamoa shakllantiryapmiz. Yangi futbolchilarning bizning tizimga tushishlariga biroz vaqt kerak bo‘ldi. Hozirgi ko‘rsatayotgan natijalarimiz bizning mehnatlarimiz va sabrimiz mevasi.

"Sho‘rtan" PFK matbuot xizmati